ޝަންގްރިއްލާ ވިލިނގިލި ރިސޯޓް އެންޑް ސްޕާގައި، "ޑައިވިންގ ޑީކޮމްޕްރެޝަން ސިކްނެސް" (ޑީކޯ) ވާ ފަރާތްތަކަށް ފަރުވާ ދިނުމަށް ހަދާފައިވާ ޗެމްބަރު ބަންދުކުރުމުގެ މަޝްވަރާތަކެއް ރިސޯޓުގެ މެނޭޖްމަންޓުން ކުރަމުން އެބަގެންދެއެވެ.
'އައްޑޫލައިވް' އަށް މައުލޫމާތު ދެމުން ޝަންގްރިއްލާގެ ސީނިއަރ މުވައްޒަފަކު ބުނިގޮތުގައި ޗެމްބަރު ބަންދުކުރުމަށް މެނޭޖްމަންޓުން މަޝްވަރާ ކުރަމުް ގެންދަނީ ޚަރަދު ކުޑަކުރުމަށް އަޅާ ފިޔަވަޅެއްގެ ގޮތުން ކަމަށެވެ.
އެހެން ނަމަވެސް އަދި ސީދާ ޗެމްބަރު ބަންދުކުރާނެކަން ނުވަތަ ނޫންކަން ނިންމާފައި ނުވި ނަމަވެސް އެކަމާއި ގުޅޭގޮތުން ޗެމްބަރުގައި މަސައްކަތް ކުރާ ޑޮކްޓަރާއި ސީނިއާ މެނޭޖްމަންޓުން ވާހަކަ ދައްކާފައެވެ.
ވިލިނގިލި ރިސޯޓްގައި ހުންނަ ޗެމްބަރު ބަންދުކޮށްފި ނަމަ އެއީ ދެކުނުގެ މަސްވެރިންނަށް ވަރަށް ބޮޑު ގޮންޖެހުމަކަށް ވާނެއެވެ. ފާއިތުވި އަހަރެއްހާ ދުވަހުގެ ތެރޭގައި ވެސް ޑީކޯވި ގިނަ ބަޔަކަށް ޝަންގްރިއްލާގެ ޗެމްބަރުގައި ވަނީ ފަރުވާ ދީފައެވެ.
ޑީކޯ ވާ ފަރާތްތަކަށް ފަރުވާ ދިނުމަށް ރާއްޖޭގައި މިވަގުތު ހުރީ އެންމެ ތިން ޗެމްބަރެވެ. އެއީ ކުރެއްދޫގައި ޗެމްބަރާއި، ޝަންގްރިއްލާގެ އިތުރުން، ބަނޑޮހުގައި ހަދާފައިވާ ޗެމްބަރެވެ.
ސިއްހީ ތަޖުރިބާކާރުން ވިދާޅުވާ ގޮތުގައި ޑީކޯ ވުމުގެ މައްސަލަ ކުރިމަތިވާ ފަރާތްތައް ފަރުވާ ދިނުމަށް ޗެމްބަރާ ހަމައަށް ގެންދަން އިތުރު ވަގުތު ނަގާ ނަމަ އެ މީހެއްގެ ހަށިގަނޑު އިތުރަށް ގޯސްވެގެން ދިއުމުގެ ފުރުސަތު ބޮޑެވެ.