މި އަހަރުގެ އެންމެ އުންމީދީ އެއް ފިލްމްގެ ތެރޭގައި ހިމެނޭ "ވީރޭ ދީ ވެޑިން" ރިލީޒް ކުރާ ތާރީހު ފަސްކޮށްފި އެވެ.
ކުރިން މި ފިލްމް ރިލީޒް ކުރާ ގޮތަށް އޮތީ މެއި މަހުގެ 28 ގަ އެވެ. ނަމަވެސް ތާރީހަށް ބަދަލު އައިކަން ޕްރޮޑިއުސަރު އެކްތާ ކަޕޫރް ވަނީ ޓްވިޓާގައި ފޭނުންނާ ހިއްސާކޮށްފަ އެވެ.
އޭނާ ބުނީ "ވީރޭ ދީ ވެޑިން" ސިނަމާތަކަށް އަންނާނީ ޖޫން މަހުގެ 1 ގައި ކަމަށެވެ. އެ ތާރީހަކީ އެކްތާގެ ކޮއްކޮ އަދި އެކްޓަރު ތުޝާރް ކަޕޫރްގެ ދަރިފުޅު ލަކްޝްގެ އުފަން ދުވަސް ވެސް މެ އެވެ.
1 June is one big day!!!! Veere di wedding arrives on my lakkshya ‘s bday!!!! Ab shaadi aur bday pe aap sab ko nimantran hai
— Ekta Kapoor (@ektaravikapoor) January 12, 2018
އެހެންވެ އެކްތާ ބުނީ މިހާރު މިއޮތީ އުފަން ދުވަހަކާއި ކައިވެނީގެ ކަންތައްގަނޑެއް އެކުވެފައި ކަމަށެވެ.
"ވީރޭ ދީ ވެޑިން" އަކީ ވިހެއުމަށް ފަހު، މަޝްހޫރު ބަތަލާ ކަރީނާ ކަޕޫރް ސްކްރީނަށް އަންނަ ފުރަތަމަ ފިލްމެވެ. ޝަޝަންކާ ގޯޝް ޑައިރެކްޓްކޮށްފައިވާ މި ފިލްމްގެ ކާސްޓުންގެ ތެރޭގައި ސޯނަމް ކަޕޫރް އަދި ސްވަރާ ބާސްކަރް ހިމެނެ އެވެ.