ފުށް ބަސްތާއެއް ގަތުމަށް އެސްޓީއޯގެ ހިތަދޫ ފިހާރައަށް ގޮސް ހުރި ދޮށީ އުމުރުގެ މީހެކެވެ. ފައިސާ ދެއްކުމަށްފަހު އޭނާ އެދުނީ ޑެލިވަރީ އަވަސްކޮށްދިނުމަށެވެ. ކައުންޓަރުން ދިން ޖަވާބަކީ، "ޑެލިވަރީ ކުރުން އޮންނަ ގޮތަކަށް ޑެލިވަރީ ކުރާނެ" ކަމަށެވެ. ތަކުރާރުކޮށް ސުވާލު ކުރުމުން ވެސް އަވަސްކޮށްދެވޭނެ ކަމެއް ނުވަތަ ޑެލިވަރީ ކުރެވޭނެ ވަގުތެއް ނުބުންޏެވެ.
މިއީ ހަމައެކަނި ހިތަދޫ އެސްޓީއޯ ފިހާރައިން ދިމާވާ ކަމެއް ނޫނެވެ. އައްޑޫގައި ހުރި އެސްޓީއޯ އެހެން ފިހާރަތަކުން ޚިދުމަތް ހޯދާ މީހުންނަށް ވެސް ކުރިމަަތިވާ މައްސަލައެކެވެ.
އެގޮތުން ހުޅުދޫގައި ހުންނަ އެސްޓީއޯ ފިހާރައިގެ ހާލަތަކީ ވެސް މިއީއެވެ. އެޑްވާންސްކޮށް ފައިސާ ނަގައިގެން ބައެއް ފަހަރަށް ހުޅުދޫ އަދި މީދޫގެ ރައްޔިތުންނަށް އައްޑޫގައި ހުރި އެސްޓީއޯގެ އެހެން ފިހާރަތަކުން އަދި މާލެ އިން ވެސް މުދާ ގެނެސްދެއެވެ. މިއީ ޒަމާނުއްސުރެ އެސްޓީއޯ ހުޅުމީދޫ ފިހާރައިން ފޯރުކޮށްދުމުން އައި ޚިދުމަތެކެވެ. ހުޅުދޫ އަދި މީދޫގެ ރައްޔިތުންނަށް ލިބިފައިވާ ވަރަށް ބޮޑު ފަސޭހައެކެވެ.
އެހެން ނަމަވެސް މިއަދު އެ ފަސޭހަކަން ތުރާލަކަށް ވެފައެވެ. އެޑްވާންސްކޮށް ފައިސާ ދެއްކިޔަސް އެ މުދާތައް ގެނެސްދޭނެ ކަމަށް ބުނާ ތާރީޚަކަށް ނުލިބެއެވެ. އެ ޝަކުވާ އުފުލައިފި ނަމަ ގިނަފަހަރަށް ލިބެނީ ރުންކުރު ޖަވާބުތަކެކެވެ.
މޫސުން ގޯސްވެގެން ކަނޑު މަގުން ގެންނަ މުދާ ފޯރުކޮށްދިނުން ލަސްވެދާނެއެވެ. އެހެން ނަމަވެސް އެކަމާއި ޝަކުވާ ކުރުމުން ކަސްޓަމަރުންނަށް ބެވުން ހުއްޓާލަން ޖެހެއެވެ.
" މިއޮތީ ރިސިޕްޓު. ފައިސާ ދެއްކިތާ ކޮން ދުވަހެއް. އަދިވެސް މުދާ ނުލިބޭ. އެކަމާއި ޝަކުވާ ކުރަންދާ މީހާއަށް ލިބެނީ ރުންކުރުވެފައި ހުންނަ މުވައްޒަފެއްގެ ފަރާތުން ހުތުރު ޖަވާބެއް. ދެން މިބުނަނީ ތިވަރަށް ޝަކުވާ ނުކުރިޔަސް ލިބޭނެއޭ." ހުޅުދޫ ވިޔަފާރިވެރިޔަކު ބުންޏެވެ.
މަރަދޫފޭދޫ އަދި ފޭދޫގައި ހުންނަ އެސްޓީއޯ ފިހާރަ އާއި މެދުވެސް ގިނަ ބަޔަކު ކުރާ ޝަކުވާ އަކީ އެތަން ތަނުގެ ބައެއް މުވައްޒަފުން ކަސްޓަމަރުންނާއި މުއާމަލާތް ކުރާ ގޮތެވެ. އެހެން ނަމަވެސް މިއީ އެސްޓީއޯ އިން ވެރިރަށް މާލޭގައި ހިންގާ ފިހާރަތަކުން ފެންނަ މަންޒަރުތަކެއް ނޫނެވެ.
އެސްޓީއޯގެ ފިހާރަތަކަކީ މީގެ އަހަރުތަކެއް ކުރިއަށް ޖެހިލާއިރު އައްޑޫ ރައްޔިތުން އެންމެ އިތުބާރު ކުރި ފިހާރަތަކެވެ. އެހެން ނަމަވެސް މިއަދު އެކަން ބަދަލުވެ ގިނަ ބަޔަކު އެފިހާރަތަކަށް ދަނީ ކޮންމެހެން ވެސް ދާން ޖެހިގެންނެވެ. އައްޑޫގައި އެސްޓީއޯގެ ފިހާރަތަކުން ޚިދުމަތް ހޯދާ މީހުންނަށް ކުރިމަތިވާ ދަތިތަކެއް ހުރިކަން އެސްޓީއޯގެ ސީނިއަރ ބޭފުޅުން ވެސް ޤަބޫލުކުރައްވައެވެ.
'އައްޑޫލައިވް' އާއި ވާހަކަ ދައްކަވަމުން އެސްޓީއޯގެ ހިއުމަން ރިސޯސް ޑިޕާޓްމަންުޓުގެ އިސްވެރިޔަކު ވިދާޅުވި ގޮތުގައި، އެކުންފުނީގެ ހުރިހާ އައުޓްލެޓެއްގައި ދެމުންދާ ޚިދުމަތް އެއްފެންވަރެއްގައި ދެމެހެއްޓުމަކީ އަމާޒެއް ކަމަށެވެ. އަދި ކަސްޓަމަރުންގެ ޝަކުވާތައް ކުންފުނިން އަޑުއަހާނެ ކަމަށާއި އަދި ރަނގަޅު ކުރަންޖެހޭ ކަންތައް ރަނގަޅު ވެސް ކުރާނެ ކަމަށެވެ.
"އައްޑޫގެ ފިހާރަތަކުގައި ރަނގަޅު ކުރަންޖެހޭ ކަންތައް އެބަހުރި، އެކަންކަމަށް އެޑްރެސް ކުރަމުން މިދަނީ. ކުންފުނިން އަބަދުވެސް ކަސްޓަމަރުންގެ ޝަކުވާތައް އަޑުއަހާނެ."
އެސްޓީއޯ އަކީ ރައްޔިތުން އެންމެ ބޮޑަށް އިތުބާރުކުރާ ކުންފުނި ކަމަށް ޕޯޑިއަމްތަކުގައި އެސްޓީއޯގެ ވެރިން ވިދާޅުވިޔަސް އައްޑޫގައި އެކަން މިވަނީ ބަދަލުވެފައެވެ. އެ އިތުބާރު އަލުން ލިބޭނީ އެސްޓީއޯގެ ފިހާރަތަކުން ދެވޭ ޚިދުމަތުގެ ފެންވަރު ރަނގަޅުކޮށްގެންނެވެ.