އައްޑޫ ސިޓީ، ހިތަދޫ ރީޖަނަލް ހޮސްޕިޓަލުގެ އެމްބިއުލާންސް ހަލާކުވެފައި އޮތުމުގެ ސަބަބުން ހާޓްއެޓޭކެއް ޖެހުނު މީހަކު ހޮސްޕިޓަލަށް ގެންގޮސް އަވަސް ފަރުވާ ނުދެވުމުގެ ސަބަބުން ނިޔާވެއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި އެމީހާ ނިޔާވެފައިވަނީ ނޭވާލާން އުނދަގޫ ވެގެން ހާޓްއެޓޭކެއް ޖެހިގެން ހޮސްޕިޓަލަށް ގެންދިޔަތާ ކުޑައިރުކޮޅެއްގެ ތެރޭގައި ހާޓްއެޓޭކެއް ޖެހިގެންނެވެ. ހާޓްއެޓޭކެއް ޖެހިގެން ނިޔާވީ ފިރިހެނެކެވެ.
އޭނާ ހިތަދޫ ހޮސްޕިޓަލަށް ގެންދިއުމަށް އެމްބިއުލާންސަށް ގުޅައިގެން ގަޑިއެއް ހާއިރު ވީއިރުވެސް އެމްބިއުލާންސް ފޮނުވިފައި ނުވަނީ އެމްބިއުލާންސް ހަލާކުވެފައި އޮތުމުގެ ސަބަބުން ކަމަށް ހޮސްޕިޓަލުގެ އޮފިޝަލަކު ވަނީ ކަށަވަރުކޮށްދީފައެވެ.
މައުލޫމާތު ލިބިފައިވާ ގޮތުގައި އެންމެ ފަހުން އެމީހާ ހޮސްޕިޓަލަށް ގެންދިޔައީ ޕްރައިވެޓް ކާރެއްގައެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ނިޔާވި މީހާ ހޮސްޕިޓަލަށް ގެންދިޔުމަށް އެމްބިއުލާންސަށް ގުޅާފައި ވަނީ އޭނާ ނޭވާލުމަށް އުނދަގޫ ވެގެންނެވެ. އޭރު އޭނާ ހުރީ އެކުވެރިއެއްގެ ގޭގައި ކަސްރަތު ކުރާ ބައިސްކަލެއް ދުއްވަން ކަމަށް ވެއެވެ.
ނިޔާވި މީހާއަށް ހާޓްއެޓޭކެއް ޖެހިފައިވާ ކަން އެނގުނީ ވެސް އޭނާ ހޮސްޕިޓަލަށް ގެންދިޔަ ފަހުންނެވެ.
"ހޮސްޕިޓަލަށް ގުޅީމާ ބުނަނީ މިފޮނުވަނީ އޭ. ހަލާކުވެފައޭ ނުބުނޭ، އެހެން ބުނިނަމަ ތާ އެހެން ގޮތެއް ވެސް ހަމަޖައްސަން އެނގޭނީ." ހާޓް އެޓޭކް ޖެހިގެން ނިޔާވި މީހާގެ އާއިލާގެ މެންބަރަކު ބުންޏެވެ.
ހިތަދޫ ރީޖަނަލް ހޮސްޕިޓަލްގައި 3 އެމްބިއުލާންސް އޮވެއެވެ. އޭގެ ތެރެއިން 2 އެމްބިއުލާންސް ހަލާކުވެފައި ވާއިރު ބޭނުންކުރަނީ އެންމެ އެމްބިއުލާންސެކެވެ.