ހައި ކޯޓު ދެކުނު ގޮފީގައި ތިއްބެވި ތިން ފަނޑިޔާރުން ތިން މަސް ދުވަހަށް މާލޭގެ ހައި ކޯޓުގައި މަސައްކަތް ކުރައްވާ ގޮތަށް ސުޕްރީމް ކޯޓުން ހަމަޖެއްސީ 2017 ވަނަ އަހަރުގެ އޯގަސްޓް މަހުގެ 29 ވަނަ ދުވަހުއެވެ.
ސުޕްރީމް ކޯޓުން އޭރު ނެރުނު އަމުރުގައި ބުނެފައިވަނީ ގޮތުން ސެޕްޓެމްބަރު 5 ވަނަ ދުވަހުން ފެށިގެން ތިން މަސް ދުވަހުގެ މުއްދަތަށް ދެކުނު ގޮފީގެ ފަނޑިޔާރުން މާލޭގެ ހައި ކޯޓުގައި މަސައްކަތް ކުރައްވާ ގޮތަށް ހަމަޖައްސާފައިވާ ކަމަށެވެ. އަދި އަދި ހައިކޯޓު ދެކުނު ގޮފީގެ ފަނޑިޔާރުން މާލޭގެ ހައި ކޯޓުގައި މަސައްކަތް ކުރައްވަން ޖެހޭނީ ދެކުނު ގޮފީގެ މަސައްކަތްތަކަށް ހުރަސް ނޭޅޭނެ ގޮތެއްގެ މަތިން ކަމަށް އެ އަމުރުގައިވެ އެވެ.
ސުޕްރީމް ކޯޓުގެ އަމުރުގައި ބުނެފައިވާ 3 މަސް ދުވަހުގެ މުހުލަތު، ހަމަވި ނަމަވެސް އަދިވެސް އެ ފަނޑިޔާރުން ތިއްބެވީ މާލޭގައެވެ. އަދި މާލޭގެ ހައިކޯޓުގެ ދެކުނު ގޮތްޕަށް އެ ފަނޑިޔާރުން ބަދަލުކުރެއްވި ފަހުން ހައިކޯޓު ދެކުނު ގޮތްޕަށް ހުށަހެޅި އެއްވެސް މައްސަލައެއް މިހާތަނަށް ކުރިއަށް ގެންގޮސްފައެއް ނުވެއެވެ.
ހައިކޯޓު ދެކުނު ގޮފީގެ މަސައްކަތް ކުރިއަށް ނުދާތީ ދެކުނުގެ ރައްޔިތުންނަށް އިސްތިއުނާފް ކުރުމުގެ ހައްގު ގެއްލިފައިވާތީ ގިނަ ބަޔަކު ގެންދަނީ އެކަމާއި ކަންބޮޑުވުން ފާޅުކުރަމުންނެވެ. އެންމެ ފަހުން ހައިކޯޓު ދެކުނު ގޮފީގައި ޝަރީޢަތުގެ އަޑުއެހުމެއް ބާއްވާފައި ވަނީ 2017 ވަނަ އަހަރުގެ ފެބްރުއަރީ މަހުގެ ތެރޭގައެވެ.
ހުޅުދޫގައި ޤާއިމްކޮށްފައިވާ ހައި ކޯޓު ދެކުނު ގޮތްޕަށް ކަނޑައަޅާފައި ތިއްބަވަނީ ފަނޑިޔާރު އަބްދުލްޣަނީ މުހައްމަދާއި ފަނޑިޔާރު ޝުޖާއު އުސްމާނާއި ފަނޑިޔާރު ޝުއައިބު ހުސައިން ޒަކަރިއްޔާ އެވެ.