ސަލްމާން ހާން އަދި ކެތްރީނާ" ބޮލީވުޑްގެ ބަތަލާއިންތަކަކާ ލޯބީގެ ގޮތުން ގުޅިގެން އުޅެފައިވީ ނަމަވެސް މިހާތަނަށް ކައިވެނިކޮށްފައި ނުވާ ސަލްމާން ހާނުގެ އަންބަކަށް އެންމެ އެކަށީގެން ވަނީ ކެޓްރީނާ ކެއިފް ކަމަށް ސާވޭއަކުން ދައްކައިފި އެވެ.
ސާވޭގެ ނަތީޖާ މިގޮތަށް ނިކުމެފައިވާ އިރު، ފާހަގަކޮށްލެވޭ ކަމަކީ ކެޓްރީނާ، 28، އަކީ އެންމެ ފަހުން ސަލްމާން، 47، ލޯބީގެ ގޮތުން ގުޅުން ބޭއްވި ބަތަލާކަމެވެ.
އެހެން ނަމަވެސް މި ދެ މީހުންގެ ގުޅުން 2010 ވަނަ އަހަރު ވަނީ ނިމުމަކަށް އައިސްފަ އެވެ. އެކަމަކު އޭގެ ސަބަބުން ދެ މީހުންގެ ޕްރޮފެޝަނަލް ގުޅުމަށް އެއްވެސް ބަދަލެއް އަައިސްފައެއް ނުވެ އެވެ. މި އަހަރު ރިލީޒްވި އެންމެ ކާމިޔާބް އެއް ފިލްމުގެ ތެރޭގައި ހިމެނޭ "އެކް ތަ ޓައިގާ" އަކީ ސަލްމާނާއި ކެޓްރީނާ އެކުގައި އެންމެ ފަހުން ފެނިގެން ދިޔަ ފިލްމެވެ.
"މެޗް މޭކިން" އެޖެންސީއަކުން 21،000 މީހުން ބައިވެރިކޮށްެގެން ނެގި ޕޯލުން ދެއްކި ގޮތުގައި 69.84 މީހުން ބޭނުން ވަނީ ކެޓްރީނާ، ސަލްމާންގެ އަންބެއްގެ ގޮތުގައި ދެކޭށެވެ.
މި ސާވޭގެ އެންމެ ހައިރާން ކުރުވަނިވި އެއް ކަމަކީ ސާވޭގައި ބައިވެރިވި ފިރިހެނުންގެ ތެރެއިން 62 ޕަސެންޓް މީހުން ސަލްމާން އެއްގޮތަކަށް ވެސް ކައިވެނި ކުރަން ބޭނުން ނުވާ ކަމަށް ބުނެފައިވުމެވެ.
ސާވޭގެ ނަތީޖާތައް ދައްކާ ގޮތުން ސައުތު އިންޑިއާގެ މީހުން ގަބޫލް ކުރާ ގޮތުގައި އަންބެއްގެ ގޮތުގައި ސަލްމާނާ އެންމެ ގުޅެނީ "ދަބަންގް" އާއި "ދަބަންގް 2" ގެ ކޯ ސްޓާ ސޮނާކްޝީ ސިންހާ އެވެ. އަދި ސާވޭގައި ބައިވެރިވި ނޯތު އިންޑިއާ މީހުން ދެކެނީ ސަލްމާނުގެ އަންބަކަށް އެންމެ އެކަށީގެން ވަނީ "ރެޑީ" އާއި "ލަންޑަން ޑްރީމްސް" ގެ ސަލްމާންގެ ކޯ ސްޓާ އާސިން އެވެ.
ސަލްމާން ވަނީ މިހާތަނަށް ބޮލީވުޑްގެ ބަތަލާއިންގެ ތެރެއިން ސަންގީތާ ބިޖިލާނީ، ސޯމީ އަލީ، އައިޝްވާރިއާ ރާއީ އާ ޑޭޓްކޮށްފަ އެވެ.
ދާދި ފަހުން ކައިވެންޏާ ބެހޭ ގޮތުން ސުވާލު ކުރުމުން ސަލްމާން ބުނީ އޭނާ ކައިވެންޏާ ދޭތެރޭ ވިސްނާނީ އޭނާގެ މައްޗަށް އުފުލިފައިވާ ކޯޓްގެ ކޭހާ މެދު ވަކި ގޮތެއް ނިމުމުން ކަމަށެވެ. ފިލްމް "ހަމް ސާތު ސާތު ހޭ" ގެ މަންޒަރުތައް 1999 ވަނަ އަހަރު ނެގި އިރު، ހިމާޔަތްކޮށްފައިވާ ޖަނަވާރެއް ޝިކާރަ ކުރި ކަމުގެ ދައުވާ ސަލްމާންގެ މައްޗަށް ވަނީ އުފުލައިފަ އެވެ.
