މިދިޔަ ޑިސެމްބަރު މަހު އައްޑޫގެ މަރުކަޒީ އިންޖީނުގޭގެ ކެޕޭސިޓީ އިތުރު ކުރުމަށް ފެނަކަ ކޯޕަރޭޝަނުން އިންސްޓޯލް ކުރި އާ ޖަނެރޭޓަރުތައް ފެއިލްވެ އައްޑޫގެ ބޮޑު ބަޔަކުން މިއަދު ވެސް ކަރަންޓް ކެނޑިއްޖެ އެވެ.
މިއަދު މެންދުރު ފަހު 1:00 ޖެހި ފަހުން ކަރަންޓް ކެނޑުމަށް ފަހު އަލުން ލިބުނީ 2:00 ޖެހި އިރު އެވެ.
މަރުކަޒީ އިންޖީނު ގެއަކީ އައްޑޫގެ ބޮޑު ބަޔަކަށް ކަރަންޓް ދޭ އިންޖީނު ގެއެވެ. އެގޮތުން ހިތަދު އާއި މަރަދޫ، މަރަދޫފޭދޫ އަދި ފޭދޫ އަށް ކަރަންޓް ދެނީ އެ އިންޖީނު ގެއިންނެވެ.
އެތަނުގެ އިންޖީނުތަކަށް މައްސަލަ ޖެހި ކަރަންޓް ކެނޑުން އާންމު ކަމަށްވެފައިވާ އިރު، މީގެ ސަބަބުން އާންމު ދިރިއުޅުމަށް ވަރަށް ބޮޑަށް ބުރޫ އަރައި، އާންމުންގެ ޝަކުވާތައް ގިނަ އެވެ.
ނަމަވެސް އާ ޖަނެރޭޓަރުތައް އިންސްޓޯލް ކުރުމުން ކަރަންޓް ކެނޑޭ މައްސަލަ ދާއިމީ ހައްލެއް އަންނާނެ ކަމަށް ފެނަކައިން ބުނި ނަމަވެސް، އެ ޖަނެރޭޓަރުތައް ފެއިލްވާ މައްސަލަ ވެސް މިހާރު ބޮޑެވެ.