އަދިތިޔާ ޗޯޕްޅާ (އަދީ) 2016 ގައި ގެނެސް ދިން ފިލްމް "ބޭފިކްރޭ" އަށް ބޮކްސް އޮފީހުގައި މާ ބޮޑު ކާމިޔާބީއެއް ނުލިބުނު ނަމަވެސް، އެ ފިލްމްގެ ލީޑް އެކްޓަރު ރަންވީރް ސިންގްއާ އެކު އޭނާ އަނެއްކާ ވެސް އާ ފިލްމެއް ހަދަން އުޅޭ ކަމަށް މީޑިއާތަކުން ރިޕޯޓްކޮށްފި އެވެ.
ނަމަވެސް މިކަމާ ބެހޭ ގޮތުން އަދީގެ ފިލްމް ކުންފުނި ޔާޝް ރާޖް ފިލްމްސް (ވައިއާރްއެފް) އިން އަދި އެއްވެސް ވާހަކައެއް ނުދައްކަ އެވެ.
އެކަމަކު މީޑިއާތަކުން ރިޕޯޓްކޮށްފައިވާ ގޮތުގައި ރަންވީރަށް ހާއްސަކޮށްގެން އަދީ ސްކްރިޕްޓެއް ލިޔަމުން އަންނަ އިރު، ފިލްމާ ބެހޭ ބައެއް ވާހަކަށް އޭނާ ވަނީ ރަންވީރްއާ މިހާރު ވެސް ހިއްސާކޮށްފަ އެވެ.
ކުރިން އަޑު އަރާފައި އޮތް ގޮތުން އަދީ ދެން ފިލްމެއް ހަދާ ނަމަ، އޭގައި ލީޑް ރޯލް ކުޅޭނީ އޭނާގެ އެންމެ ހިޓް ފިލްމްތައް ކުޅުނު ޝާހްރުކް ހާނެވެ. އަދީ ޑައިރެކްޓްކޮށް، ޝާހްރުކް ހާނާއި ކާޖޮލް ކުޅުނު 1995 ގެ "ދިލްވާލޭ ދުލްހަނިޔާ ލޭޖޭއޭގޭ" އަކީ އިންޑިއާގެ ސިނަމާގެ އެންމެ ކާމިޔާބު އެއް ފިލްމެވެ.
ނަމަވެސް 2008 ގައި ރިލީޒް ކުރި "ރަބް ނެ ބަނާދީ ޖޯޅީ" އަށް ފަހު އަދީ ޑައިރެކްޓް ކުރި "ބޭފިކްރޭ" ގައި ރަންވީރް ހިމެނުމަކީ ވެސް ގިނަ ބަޔަކަށް ހައިރާންކަން ލިބުނު ކަމެކެވެ.
ވައިއާރްއެފްގެ "ބޭންޑް ބާޖާ ބާރާތު" އިން 2010 ގައި ބޮލީވުޑަށް ނުކުތް ރަންވީރަކީ މިހާރު އަދީގެ ވަރަށް ބޮޑު ފެވަރިޓިކެވެ. އޭނާ ބުނެފައިވާ ގޮތުގައި "ބޭފިކްރޭ" ލިޔުމުގެ ކުރިން ވެސް، އޭނާގެ ސިކުނޑީގައި ހުރީ ރަންވީރް ލީޑަށް ލައިގެން ފިލްމް ހަދާށެވެ.
ނަމަވެސް އާ ފިލްމާ ބެހޭ ގޮތުން ރަންވީރް ވެސް އަދި އަދީ ވެސް އެއްވެސް ވާހަކައެއް ދައްކާފައި ނުވާތީ އެ މީހުންގެ އާ ފިލްމާ ބެހޭ އެއްވެސަް ތަފުސީލެއް އަދި ނުލިބެ އެވެ.
މާދަމާ ރިލީޒް ކުރާ "ޕަދްމާވަތު" އަށް ފަހު ރަންވީރްގެ ކުރިއަށް ހުރި ފިލްމްތަކުގެ ތެރޭގައި ޒޯޔާ އަހްތަރުގެ "ގުލީ ބޯއި"، ރޯހިތު ޝެޓީގެ "ސިމްބާ" އަދި ކަބީރް ހާންގެ "83" ހިމެނެ އެވެ.