ކޮމިޝަނަރ އޮފް ޕޮލިސް އަހުމަދު އަރީފް ދެކޮޅު ހެއްދެވުމުން އެބޭފުޅާ މަގާމުން ވަކިކޮށްފައިވާ ކަމުގެ މައުލޫމާތު ލިބިވަޑައިގެންފައިވާ ކަމަށް ގަލޮޅު ދެކުނު ދާއިރާގެ މަޖިލިސް މެންބަރު އަހްމަދް މަހްލޫފް ވިދާޅުވެއްޖެއެވެ.
މަހްލޫފް ކުރެއްވި ޓްވީޓެއްގައި ވިދާޅުވެފައިވާ ގޮތުގައި ސީޕީ އަރީފް މަގާމުން ވަކިކޮށްފައި ވަނީ، ދިއްގަރު ދާއިރާގެ މަޖިލިސް މެންބަރު ފާރިސް މައުމޫން ހައްޔަރު ކުރުމަށް ދެކޮޅު ހެއްދެވުމުންނެވެ.
ސީޕީ އަރީފް މަގާމުން ވަކިކުރިކަމަށް މަހްލޫފް ވިދާޅުވި ނަމަވެސް މަހްލޫފްގެ ވާހަކަތައް ފުލުހުން ވަނީ ދޮގުކޮށްފައެވެ.
މަހްލޫފްގެ ޓްވީޓާ ގުޅިގެން ފުލުހުންގެ ތަރުޖަމާން އަހްމަދު ޝިފާން ވިދާޅުވީ ކޮމިޝަނާ އޮފް ޕޮލިސް އަހްމަދު އަރީފް އިސްތިފާ ދެއްވި ކަމަށް ދެކެވޭ ވާހަކަތަކަކީ ދޮގެއް ކަމަށެވެ.
ފާރިސް ހައްޔަރު ކުރުމަށް އަރީފް ދެކޮޅު ހެދިކަމުގެ އަޑު ފެތުރުނު އިރު ފާރިސްގެ އަނބިކަނބަލުންނާއި ސީޕީ އަރީފްގެ އަނބިކަނބަލުންނަކީ އެއްބަނޑު އެއްބަފާ ދެ ބެއިން ކަން ފާހަގަކޮށްލެވެއެވެ.
މީގެ އިތުރުން މަހްލޫފް ވަނީ ފުލުހުންގެ އިސްމަގާމުތަކުގެ ތިއްބެވި ހުރިހާ ބޭފުޅުން ވެސް ފާރިސް ހައްޔަރު ކުރުމާއި ދެކޮޅު ހެދުމަށް ގޮވާލައްވާފައެވެ.
ފާރިސް ހައްޔަރުކުރުމުގެ އަމުރެއް ހޯދިކަމުގެ އަޑުތައް ފެތުރެން ފެށުމުން އެކަމާއި ގުޅޭ ގޮތުން ވަކިއެއްޗެއް ހާމަކުރެވެން ނެތް ކަމަށް ފުލުހުން ވަނީ ބުނެފައެވެ.
ތަފާތު ދެ ދައުވާއެއް ފާރިސްގެ މައްޗަށް އުފުލާފައިވާއިރު އޭނާ މިނިވަންކޮށްފައިވަނީ، ބަންދުކޮށްފައި ހުންނަތާ 6 މަހަަށް ވުރެ ގިނަ ދުވަސް ފަހުން މިދިޔަ ބުރާސްފަތި ދުވަހުއެވެ.
ފާރިސް މިނިވަން ކޮށްފައިވަނީ ތިން ޝަރުތުތަކެއް ކުރިމަތި ކުރުމަށް ފަހުގައެވެ. އެއީ މައްސަލައަށް ނުވަތަ ހެއްކަށް ނުފޫޒު ފޯރާނެ ފަދަ ކަމެއް ނުކުރުމަށާއި މާލެއިން ބޭރަށް ދާނަމަ ކޯޓުގެ ހުއްދަ ހޯދުމަށާއި ގަޑިއަށް ކޯޓަށް ހާޒިރުވުމަށް ޝަރުތުކޮށެވެ.