މިސް ޔުނިވާސްގެ މަގާމު ހާސިލްކޮށްފައިވާ ބޮލީވުޑްގެ ބަތަލަކީ ފިލްމް ކުޅުނު ނަމަވެސް، މާ ބޮޑު ކުރިއެރުމެއް ލިބުނު ތަރިއެއް ނޫނެވެ. އޭނާގެ މާ ފާހަގަކޮށްލެވޭ ކަހަލަ ފިލްމްތަކެއް ވެސް ނެތެވެ.
ބެލުންތެރިން އެންމެ ބޮޑަށް ވެސް ހަނދާން ހުންނަ ފިލްމަކީ ޝާހްރުކް ހާނާ އެކު ކުޅުނު "މޭ ހޫނާ" އެވެ.
ސުޝްމިތާ އެންމެ ފަހުން ފެނުނީ 2010 ގައި ނުކުތް "ނޯ ޕްރޮބްލަމް" އިންނެވެ.
އޭގެ ފަހުން އޭނާ އެއްވެސް ފިލްމަކަށް ސޮއިކޮށްފައިވާ ނުވާ އިރުމ ސުޝްމިތާ އަބަދު ވެސް ބުނަނީ ރަނގަޅު ސްކްރިޕްޓަކަށް އިންތިޒާރު ކުރަނީ ކަމަށެވެ.
ހުކުރު ދުވަހު ފާހަގަ ކުރި އިންޑިއާގެ ޖުމްހޫރީ ދުވަހާ ގުޅުވައިގެން ބޭއްވި ކުޑަކުދިންގެ އާޓް ފެސްޓިވަލެއްގައި އޭނާ އެޑަޕްޓްކޮށްގެން ގެންގުޅޭ އަންހެން ދަރިފުޅު އަލީޝާއާ އެކު ނޫސްވެރިންނާ ވާހަކަ ދައްކަމުން ސުޝްމިތާ ބުނީ ރަނގަޅު ސްކްރިޕްޓަލަށް ލޯއަޅާތާ މިހާރު ދޮޅު އަހަރެއްހާ ދުވަސްވެއްޖެ ކަމަށެވެ.
"އަހަރެން ބޭނުން އެނބުރި އަންނަން. އެކަމަކު ހިތްހަމަޖެހޭ ކަހަލަ ސްކްރިޕްޓެއް ލިބުނު އިރަކުން،" 1996 ގައި ފިލްމް "ދަސްތަކް" އިން ބޮލީވުޑަށް ނުކުތް ބަތަލާ ބުންޏެވެ.
ސުޝްމިތާ ބުނި ގޮތުގައި އޭނާ އަށް މިހާރު ފިލްމްތަކަށް ވަގުތު ދެވެން އެބަ އޮތެވެ.
"ފިލްމަކަށް ހައެއްކަ މަސް އަހަންނަށް ދެވިދާނެ މިހާރު. އެކަމަކު އެ ވަގުތު ދޭން ބޭނުން ވަނީ ހިތްހަމަޖެހޭ ވަރުގެ މަސައްކަތަކަށް،" އާންކޭން އާއި ބީވީ ނަމްބަރު 1 ފަދަ ފިލްމްތައް ކުޅުނު ސުޝްމިތާ، 42، ބުންޏެވެ.