ހައުސިން މިނިސްޓްރީގެ ކޯޑިނޭޓަރުކަމުން ސ.ފޭދޫ، އާބުރުޒީގޭ ހަސަން ނާޒިލް އިސްތިއުފާ ދެއްވައިފި އެވެ.
ނާޒިލް ވަނީ އިސްތިއުފާ ދެއްވިކަން "އައްޑޫ ލައިވް" އަށް މިއަދު ކަށަވަރުކޮށް ދެއްވައިފަ އެވެ.
އޭނާ ވިދާޅުވީ ހައުސިން މިނިސްޓްރީގެ ކޯޑިނޭޓަރުގެ މަގާމުން އިސްތިއުފާ ދެއްވުމަކީ އަމިއްލަ ނިންމެވުމެއް ކަމަށާއި ވަކި ފަރާތެއްގެ ނުފޫޒަކާ ހެދި އިސްތިއުފާ ދެއްވީ ނޫން ކަމަށެވެ.
ނާޒިލް އިސްތިއުފާ ހުށަހެޅި އިރު މި ފަހަކަށް އައިސް ޕީޕީއެމް ފޭ ބައެއް އެކްޓިވިސްޓުންގެ ފަރާތުން އޭނާށް އެކި ކަހަލަ ފާޑު ކިޔުންތައް އަމާޒުވެފައިވެ އެވެ. އަދި ޕީޕީއެމް ފޭދޫ ގޮފީގެ ކަންކަން އެނގޭ މީހުން ބުނާ ގޮތުން ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު އިބްރާހިމްދީދީ (އައިބީ) އާއި ނާޒިލްގެ ގުޅުމަށް ވަނީ ވަަރަށްް ބޮޑަށް ބުރޫ އަރައިފަ އެވެ.
މިދިޔަ އަހަރުގެ މެއި މަހުގެ ތެރޭގައި ކޯޑިނޭޓަރުގެ މަގާމަށް އައްޔަން ކުރި ނާޒިލް، އެ މަގާމުގައި ހުންވާތާ އަހަރެއް ވާން ކައިރިވެފައި ވަނިކޮށް އިސްތިއުފާ ދެއްވި އިރު، އޭނާ މަގާމަށް ހަމަޖެއްސީ ކޯޑިނޭޓަރަކަށް ކުރިން ހުންނެވި މުހައްމަދު ފައިސަލް ފެބްރުއަރީ 22، 2017 ގައި މަގާމުން ވަކި ކުރުމަށް ފަހު އެވެ.
ނާޒިލް އިސްތިއުފާ ދެއްވުމުން މިހާރު އައްޑޫގައި ތިއްބަވާނީ ހައުސިން މިނިސްޓްރީގެ ތިން ކޯޑިނޭޓަރުންނެވެ. އެއީ ހުޅުމީދޫގެ ކުރީގެ ކައުންސިލަރު އަލީ މުހައްމަދު (އައްދު) އާއި ހުޅުދޫގެ ކުރީގެ ކަތީބު އަބްދުﷲ ޖަމީލާއި އަބްދުﷲ ޒުހައިރް (އަބްހަރީ) އެވެ.