ސަދަން ޓްރާންސްޕޯޓް ލިންކް (އެސްޓީއެލް) ގެ ޖެނެރަލް މެނޭޖަރު މުހައްމަދު ޝަފީޢު މަގާމުން އިސްތިއުފާ ދީފިއެވެ.
ޝަފީޢު މަގާމުން އިސްތިއުފާ ދެއްވި ސަބަބު ސާފުވެފައި ނުވާއިރު، ހަމަ މިއަދު ހައުސިން މިނިސްޓްރީގެ ކޯޑިނޭޓަރުކަމުން ފޭދޫ އަށް ނިސްބަތްވާ ހަސަން ނާޒިލް ވެސް ވަނީ އިސްތިއުފާ ދީފައެވެ.
އެސްޓީއެލްގެ ޖެނެރަލް މެނޭޖަރު ކަމުގެ މަގާމަށް ޝަފީޢު އައްޔަން ކުރީ 2016 ވަނަ އަހަރުގެ މެއި މަހުގެ ތެރޭގައެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ދަށުން ހިންގާ އެސްޓީއެލް އިން ލޯންޗް ކުއްޔަށް ދޫކޮށްގެން ލިބުނު ފައިސާ އަމިއްލަ މީހެއްގެ އެކައުންޓަށް ޖަމާކޮށްފައިވާ މައްސަލަ އެއް ވެސް މީގެ ކުރިން ވަނީ ފެންމަތިވެފައެވެ.
އަދި 2016 ވަނަ އަހަރުގެ ތެރޭގައި ފޭދޫގައި އެސްޓީއެލްގެ ގިނަ އަދަދެއްގެ ފައިސާ އަށް ހިޔާނާތްތެރިިވިކަމުގެ ތުހުމަތުގައި އެ އޮފީހުގެ އެޑްމިން އެންޑް ފައިނޭންސް މެނޭޖަރުގެ މަގާމުގައި ހުރި އަބްދުﷲ ރަޝީދު (ބުލްބުލް އައްދު) ހައްޔަރު ކޮށްފައިވެއެވެ. އެ މައްސަލައިގައި އޭނާގެ މައްޗަށް ކުރާ ދައުވާގެ އަޑުއެހުންތައް ކްރިމިނަލް ކޯޓުގައި ކުރިއަށް އެބަދެއެވެ.