ބޮޑެތި މައްސަލަތަކަކާ އެކު ރިލީޒް ނުކުރެވުމުގެ އިތުރަށް ފިލްމް ސިނަމާގައި މިހާރު އޮތް އިރު ވެސް ތަފާތު ގޮންޖެހުންތަކާ ކުރިމަތިލާން ޖެހިފައިވާ ސަންޖޭ ލީލާ ބަންސާލީގެ ތާރީހީގެ ލޯބީގެ ފިލްމް "ޕަދްމާވަތު" އާ ދޭތެރޭ ވަރަށް ބޮޑަށް ފަހުރުވެރިވާ ކަމަށާއި އެ ފިލްމަށް ލިބެމުން އަންނަ ކާމިޔާބީއާ ދޭތެރޭ ވެސް އުފާ ކުރާ ކަމަށް ބަތަލާ ދީޕިކާ ޕަދްކޯން ބުނެފި އެވެ.
"ޕަދްމާވަތު" އަކީ ބަންސާލީއާ އާ އެކު ދީޕިކާ މަސައްކަތް ކުރި ތިން ވަނަ ފިލްމެވެ.
އޭނާ ބުނީ އެ ފިލްމްގައި ކުޅުނު ރޯލަކީ އެންމެ ބުރަކޮށް މަސައްކަތް ކުރަން ޖެހުނު ކެރެކްޓާ ކަމަށާއި ފިލްމާ ދޭތެރޭ ވަރަށް ހިތްހަމަޖެހޭ ކަމަށެވެ.
"ފިލްމް ބަލާފައި މަންމަ އާއި ބައްޕަ ވެސް ތިބީ ވަރަށް އުފަލުން. އެ މީހުންގެ ދަރިފުޅު ކުޅެފައިވާ ރޯލާ ދޭތެރޭ އެ މީހުން ވަރަށް ފަހުރުވެރިވޭ،" ދީޕިކާ ބުންޏެވެ. "އަދި ސަންޖޭ ސާގެ މި ފިލްމުން އަހަންނަށް ފުރުސަތު ދިނީތީ ވަރަށް ބޮޑަށް ޝުކުރު ވެސް އަދާ ކުރަން."
"ޕަދްމާވަތު" އަށް ދިމާވި މައްސަލަތަކާ ހެދި ދެން ތާރީހީ ކެރެކްޓާއެއް ކުޅެފާނެތޯ ނޫސްވެރިން ސުވާލު ކުރުމުން ދީޕިކާ ބުނީ "ނުކުޅޭނެ" ކަމަށެވެ.
ދީޕިކާއާ އެކު ޝާހިދު ކަޕޫރާއި ރަންވީރް ސިންގް ލީޑް ރޯލް ކުޅެފައިވާ "ޕަދްމާވަތު" ސިނަމާތަކަށް އައީ މި މަހުގެ 25 ގަ އެވެ. އަދި އެ ފިލްމްގެ އާމްދަނީ މިހާރު ވަނީ 112 ކްރޯޑް ރުޕީސް އަށް އަރައިފަ އެވެ. މާނާއަކީ "ޕަދްމާވަތު" 100 ކްރޯޑް ކުލަބަށް ވަނީ އެވެ.
ބޮލީވުޑްގެ ވިޔަފާރި ހަބަރުތައް ދިރާސާ ކުރާ ފަރާތްތަކުން ބުނާ ގޮތުގައި ފިލްމަށް ލިބެމުން އަންނަ ތަރުހީބަށް ބަލާ އިރު، "ޕަދްމާވަތު" 200 ކްރޯޑް ރުޕީސްގެ އާމްދަނީއެއް ހޯދުން ވަރަށް ގާތެވެ.
މި ފިލްމަށް ކްރިޓިކުންގެ ތައުރީފު ވެސް ވަނީ އޮއްސާލައިފަ އެވެ.