ސޯނަމް ކަޕޫރް އޭނާގެ ބައްޕަ އަނިލް ކަޕޫރާ އެކު ފުރަަތަމަ ފަހަރަށް ސްކްރީން ހިއްސާ ކުރާ ފިލްމް "އޭކް ލަޅްކީ ކޯ ދޭކާ ތޮ އޭސާ ލަގާ" ގެ ޝޫޓިން ފަށައިފި އެވެ.
މަޝްހޫރު ޑައިރެކްޓަރު/ޕްރޮޑިއުސަރު ވިންދޫ ވިނޯދް ޗޯޕްޅާގެ އަންހެން ދަރިފުޅު ޝެލީ ޗޯޕްޅާ ލިޔެ، ޑައިރެކްޓް ކުރާ ފިލްމްގެ ޕަންޖާބް ޝޫޓިންގެ ތެރެއިން ނަގާފައިވާ ފޮޓޯއެއް ސޯނަމް މިއަދު ވަނީ އިސްޓަގްރާމްގައި ވެސް ހިއްސާކޮށްފަ އެވެ.
އޭގެ ކެޕްޝަނުގައި އޭނާ ބުނީ ފިލްމީ ދާއިރާ އަށް ނިކުތްތާ 10 އަހަރު ފަހުން ބައްޕައާ އެކު، މަސައްކަތްކޮށްލެވޭތީ ކުރެވޭތީ އުފާވާ ކަމަށެވެ.
އަދި މިފަދަ ފުރުސަތެއް ތަނަވަސްކޮށް ދިން ކަމަށްޓަކައި ސޯނަމް ވަނީ ޝެލީ އާއި ވިންދޫ އަށް ވަރަށް ބޮޑަށް ޝުކުރު ވެސް އަދާކޮށްފަ އެވެ.
"އޭކް ލަޅްކީ ކޯ ދޭކާ ތޮ އޭސާ ލަގާ" އަކީ ބައްޕައަކާ އަންހެން ދަރިއެއްގެ ގުޅުމުގެ މައްޗަށް ހަދާ ފިލްމެކެވެ. ފިލްމްގައި އަނިލް ކުޅޭނީ ސޯނަމްގެ ބައްޕަގެ ރޯލެވެ.
މި ފިލްމަށް ނަން ދީފައި ވަނީ ވިންދޫ ޑައިރެކްޓްކޮށް، އަނިލް މުހިއްމު ރޯލެއް ކުޅުނު 1994 ގެ ފިލްމް "1942: އަ ލަވް ސްޓޯރީ" ގެ ވަރަށް މަޝްހޫރު ލަވައަކުންނެވެ.
މި އަހަރުގެ އޮކްޓޯބަރު މަހުގެ 12 ގައި ރިލީޒް ކުރަން ތާވަލްކޮށްފައިވާ "އޭކް ލަޅްކީ ކޯ ދޭކާ ތޮ އޭސާ ލަގާ" ގައި ސޯނަމްގެ ލޯބިވެރިޔާގެ ރޯލުން ފެނިގެން ދާނީ ރާޖްކުމާރް ރާއޯ އެވެ. މިއީ މި ދެ ތަރިން އެކުގައި ކުޅޭ ފުރަތަމަ ފިލްމެވެ.
ސޯނަމް އާއި ރާޖްކުމާރް އެކީގައި އެންމެ ފުރަތަމަ ކުޅުނީ 2015 ގައި ރިލީޒް ކުރި "ޑޯލީ ކި ޑޮލީ" އެވެ.
ދަރިފުޅު ސޯނަމްއާ އެކު ފިލްމެއް ކުޅުމުގެ އިތުރަށް ފިރިހެން ދަރިފުޅު ހާޝްވަރްދަން ކަޕޫރާ އެކު ވެސް ފިލްމެއް ކުޅެން އަނިލް ސޮއިކޮށްފައިވެ އެވެ.