އައްޑޫގެ ދެ ރަށެއްގެ ދެ ފުޓްބޯޅަ ދަނޑު ރަނގަޅު ފެންވަރަކަށް ހަދަން ނިންމައި އެކަމާ ގުޅޭ މަސައްކަތް މިހާރު ފަށާފައިވާ ކަމަށް އައްޑޫ ސިޓީ ކައުންސިލުން ބުނެފި އެވެ.
ކައުންސިލަރު އަބްދުﷲ ތޮއްޔިބް (ޓޮމް) ވިދާޅުވީ ހެދުމަށް ނިންމާފައި ވަނީ މަރަދޫފޭދޫ ދަނޑާއި ހިތަދޫ މަނިކު ދަނޑު ކަަމަށެވެ. އޭނާ ވިދާޅުވީ އެ ދެ ދަނޑު ތަރައްގީ ކުރުމަށް ކުރިއަށް ގެންދާ މަޝްރޫއުގެ ދަށުން ދެ ދަނޑު ވެސް މިހާރު ސާވޭކޮށް ނިމިފައިވާ ކަމަށެވެ. އަދި މިހާރު ކުރަނީ އެ ދެ ދަނޑު ޑިޒައިން ކުރުމުގެ މަސައްކަތް ކަމަށް ވެސް ޓޮމް ވިދާޅުވި އެވެ.
އޭނާ ވިދާޅުވީ މަނިކު ދަނޑު ހެދުމަށް ގާތްގަޑަކަށް 1.3 މިލިއަން ރުފިޔާ އަދި މަރަދޫފޭދޫ ދަނޑު ތަރައްގީ ކުރުމަށް މިލިއަނެއްހާ ރުފިޔާ ހަރަދު ވާނެ ކަމަށެވެ. އަދި މިކަން ކުރަނީ ކައުންސިލްގެ ބަޖެޓުން ކަމަށް ވެސް ޓޮމް ވިދާޅުވި އެވެ.
"އެ ދެ ދަނޑު ނިމޭ އިރު، ވަށާ ފާރު ރާނައި ފެންސް ޖަހައި އެންޓްރޭންސް ގޭޓަކާއި އެގްޒިޓް ގޭޓެއް ލައި ލައިޓްތައްް ވެސް ޖަހާނެ،" ޓޮމް ވިދާޅުވި އެވެ. "އޭރުން އެއްވެސް ދަތި ކަމެއް ނެތި ރޭގަނޑު ވެސް އެ ދަނޑުތައް ބޭނުން ކުރެވޭނެ."