މޯލްޑިވްސް ކަރެކްޝަނަލް ސަރވިސްގެ ފަރާތުން ރައީސް އަބްދުﷲ ޔާމީންގެ އަމުރަށް އަދާލާތު ޕާޓީގެ ރައީސް ޝެއިޚް އިމްރާން އަބްދުﷲ ރަހީނުކޮށްފައިވާ ކަމަށް އެޕާޓީން ބުނެފިއެވެ.
އަދާލަތުން ބުނެފައިވާ ގޮތުގައި ސުޕްރީމް ކޯޓުގެ އަމުރު ތަންފީޒު ކުރާނެ ކަމަށް ކަރެކްޝަންސް އިން ބުނަމުން ގެންދަނީ އޮޅުވާލުމުގެ ނިޔަތުގައި ކަމަށެވެ. އަދި އަމުރު ތަންފީޒު ނުކޮށް ލަސްކުރަމުން ދަނީ އެކަން ކުރުމުގެ ނިޔަތެއް ނެތުމުން ކަމަށް ވެސް އަދާލަތުން ވަނީ ބުނެފައެވެ.
އަދާލަތު އިތުރަށް ބުނެފައިވާ ގޮތުގައި ސުޕްރީމް ކޯޓުގެ އަމުރު ތަންފީޒު ކުރުމުގައި އިހުމާލުވާ ފަރާތްތަކާއި މެދު އެޕާޓީން ޤާނޫނީ ފިޔަވަޅު އަޅާނެއެވެ.
ސުޕްރީމް ކޯޓުން ރޭ ނެރުނު އަމުރުގައި ޖަލުގައި ތިއްބެވި ސިޔާސީ ލީޑަރުން މިނިވަން ކުރުމަށް އަމުރުކުރިތާ 12 ގަޑިއިރު ވާން ކައިރި ވެފައިވާއިރު މިހާތަނަށް އެއްވެސް ސިޔާސީ ލީޑަރަކު މިނިވަން ކޮށްފައެއް ނުވެއެވެ.