ގިނަ ބަޔަކަށް ސިހުން ގެނުވީ ރޭ ސުޕްރީމް ކޯޓުން ކުއްލި ގޮތަކަށް ނެރުނު ވަރުގަދަ އަމުރާއި އެކުގައެވެ. ކުޑަ ހިނދުކޮޅެއްގެ ތެރޭގައި އިދިކޮޅު ފަރާތްތަކުން ނިކުމެ މަގުތައް ފުރާލި މަންޒަރެވެ.
ސުޕްރީމް ކޯޓުން ނެރުނު އަމުރުގައި ރައްޔިތުންގެ މަޖިލީހުގެ 12 މެންބަރެއްގެ ގޮނޑި ނުގެއްލޭނެ ކަމަށް ކަނޑައަޅާފައި ވާއިރު ޖަލަށް ލާފައި ތިބި އިިދިކޮޅު ލީޑަރުންގެ މައްޗަށް ހިންގި ޝަރީއަތްތައް ރަނގަޅު ނޫން ކަމަށް ނިންމައި، އެބޭފުޅުން ވަގުތުން ބަންދުން ދޫކުރަުމަށް ވެސް ވަނީ އަމުރުކޮށްފައެވެ.
ވަރަށް ސާފުކޮށް ސުޕްރީމް ކޯޓުން ނެރުނު އަމުރުގައި ދައުލަތުގެ މުއައްސަސާތަކުން އަމަލުކުރަން ޖެހޭނެ ގޮތާއި އަދި އެ ހުކުމަށް އަމަލު ނުކޮށްފި ނަމަ ފިޔަވަޅު އެޅުމަށް ޕްރޮސިކިއުޓަރ ޖެނެރަލް އަށް ވެސް ވަނީ އަންގަވާފައެވެ.
އެހެން ނަމަވެސް އެ ހުކުމަށް 12 ގަޑިއިރު ވާން ކައިރި ވެފައިވާއިރު ހުކުމް ތަންފީޒު ކުރުމަށް ސަރުކާރުން މަސައްކަތް ކުރާ ތަނެއް ނުފެނެއެވެ. ފުލުހުންނާއި ކަރެކްޝަނަލް ސަރވިސް އިން ސުޕްރީމް ކޯޓުގެ ހުކުމް ތަންފީޒު ކުރަން މަސައްކަތް ކުރަމުންދާ ކަމަށް ބުންޏަސް އެކަން ކުރާ ކަން ކަށަވަރެއް ނުވެއެވެ.
މީގެ އިތުރުން ސުޕްރީމް ކޯޓުގެ ހުކުމް ތަންފީޒު ކުރުން ލަސްވެ ގިނަ ބަޔަކު ކަންބޮޑުވުން ފާޅު ކުރަމުން ދަނިކޮށް ރައީސް އޮފީހުން އިނގިރޭސި ބަހުން ނެރުނު ބަޔާނެއްގައި ވަނީ އެ ހުކުމްގައި "އޮޅުންއަރާ ކަންތައްތަކެއް ހުރިކަމަށް" ބުނެފައެވެ.
ސަރުކާރަށް ތާއީދު ކުރާ މެންބަރުން ޓީވީތަކުގައި ކިތަންމެ ވާހަކައެއް ދެއްކެވިޔަސް ހަގީގަތަކީ ސުޕްރީމް ކޯޓުން ރޭ ނެރުނު އަމުރާއި ހިލާފަށް ނުވަތަ އަމުރަށް ހުރަސް އެޅުމަށް ސަރުކާރުން މަސައްކަތް ކޮށްފިއެވެ. އަދިވެސް ކުރަމުން ގެންދަނީއެވެ.
ސުވާލަކީ މިކަން މިގޮތަށް ހިނގާއިރު ދެން ވާނީ ކިހިނެތް ހެއްޔެވެ؟ ސުޕްރީމް ކޯޓުން މިކަމާއި މެދު އިތުރު ފިޔަވަޅެއް އަޅާފާނެ ހެއްޔެވެ؟
ސުޕްރީމް ކޯޓުގެ އަމުރު ތަންފީޒު ކުރުމަށް ފަރުވާކުޑަ ނުކުރަން އެ ކޯޓުން އަންގާފައި ވަނިކޮށް މަގުބޫލު އުޒުރެއް ނެތި ސަރުކާރުން މި ކަންކަން ލަސްކުރުމަކީ ސުޕްރީމް ކޯޓަށް ގޮންޖެހުން ކަމަށް ޤާނޫނީ ވަކީލުން ޤަބޫލުކުރައްވައެވެ.
'އައްޑޫލައިވް' އާއި ވާހަކަ ދެއްކި ޤާނޫނީ ވަކީލަކު ވިދާޅުވި ގޮތުގައި، ސުޕްރީމް ކޯޓުން މިހާލަތުގައި އެ ކޯޓުގެ އަމުރު ތަންފީޒު ނުކުރާ ފަރާތްތަކާއި މެދު ފިޔަވަޅު އަޅަން ޖެހޭ ކަމަށެވެ. އެއީ ރާއްޖޭގައި ޤާނޫނުގެ ބާރު ދެމެހެއްޓުމަށް ކޮންމެހެން ވެސް ކުރަންޖެހޭ ކަމެއް ކަމުގައި އޭނާ ވިދާޅުވިއެވެ.
އަދި މީގެ ކުރިން ސުޕްރީމް ކޯޓުގެ ނިންމުންތަކަށް ފާޑުކިޔާ ފަރާތްތަކަށް އެ ކޯޓުގެ ހުރުމަތް ކަނޑާލަން އުޅޭ ކަމުގެ ތުހުމަތުގައި ވަރުގަދަ އިންޒާރުތަކެއް ދީފައިވެއެވެ. އެގޮތުން 2016 ވަނަ އަހަރުގެ ތެރޭގައި ސުޕްރީމް ކޯޓުން ނެރުނު ބަޔާނެއްގައި ވަނީ ވަކި މަގްސަދުތަކެއް ހާސިލް ކުރުމަށް، ކޯޓުތަކުގެ ހުކުމްތައް އަމިއްލަ އަށް މާނަ ކުރަމުންދާ ކަމަށާއި މިއީ ގާނޫނީ ވެރިކަން ނެގެހެއްޓުމަށް ހުރަސްތައް ކުރިމަތިވާ ކަމެއް ކަމަށް ބުނެފައެވެ.
އަދި ކޯޓުތަކުގެ ހުރުމަތް ކެނޑޭ ފަދަ ގޮތަށް ވާހަކަ ދައްކާ މީހުންނާ މެދު ފިޔަވަޅު އަޅާނެ ކަމަށް ސުޕްރީމް ކޯޓުން އިންޒާރު ދީފައިވެއެވެ.
ސުޕްރީމް ކޯޓުން ރޭ ނެރުނު އަމުރަށް 12 ގަޑިއިރު ވާން ކައިރި ވެފައިވާއިރު އެ އަމުރު ތަންފީޒު ނުކޮށް ސަރުކާރުގެ ވެރިން ތިއްބެވުމުގެ ފުރުސަތު ސުޕްރީމް ކޯޓުން ދީފާނެ ހެއްޔެވެ؟
ޤާނޫނީ ގޮތުން ބަލާއިރު ސުޕްރީމް ކޯޓުގެ އަމުރު ތަންފީޒުކުރުން ލަސްކުރާ މައްސަލައިގައި އެ ކޯޓުން ފިޔަވަޅު އެޅުމުގެ ފުރުސަތު ބޮޑެވެ. އެ ފިޔަވަޅަކީ ފަހަރެއްގައި ގިނަ ބަޔަކަށް ހައިރާން ކުރުވަނިވި ފިޔަވަޅަކަށް ވެސް ވެދާނެއެވެ.