ޕީޕީއެމްގެ ސެކްރެޓަރީ ޖެނެރަލް އަދި ނިލަންދޫ ދާއިރާގެ މަޖިލިސް މެންބަރު ޑރ.އަބްދުﷲ ޚަލީލް ކުއްލިގޮތަކަށް މާލެއިން ބޭރަށް ފުރާވަޑައިގެންފިއެވެ.
'އައްޑޫލައިވް' އިތުބާރު ހުރި ގޮތެއްގައި މައުލޫމާތު ލިބިފައިވާ ގޮތުގައި ޚަލީލް ފުރާވަޑައިގަތީ މިއަދު ހެނދުނުގެ ވަގުތެއްގައެވެ. ޚަލީލް ވަޑައިގެންނެވީ އޭނާގެ ރަށް ކަމަށްވާ ފ. ނިލަންދޫ އަށެވެ.
ކުއްލިގޮތަކަށް ޚަލީލް މާލެއިން ބޭރަށް ފުރާވަޑައިގެންފައިވާއިރު ޕީޕީއެމް އަށް ނިސްބަތްވާ އިނގުރައިދޫ ދާއިރާގެ މެންބަރު އިބްރާހިމް ފަލާހް ވެސް މާލެއިން ބޭރަށް ފުރާވަޑައިގެންފައިވާ ކަމަށް ވެއެވެ.
ސުޕްރީމް ކޯޓުން ސިޔާސީ ލީޑަރުން މިނިވަން ކުރުމަށާއި އަދި އިދިކޮޅު 12 މެންބަރެއްގެ ގޮނޑި ނުގެއްލޭ ކަމަށް ކުރި ހުކުމާއި އެކު ސަރުކާރުގެ ބައެއް ވަޒީރުންނާއި މެންބަރުން ރާއްޖެ ދޫކުރައްވައި ފިއްލަވަން އުޅުއްވާ ކަމުގެ އަޑުތައް ދަނީ ފެތުރެމުންނެވެ.
އެގޮތުން ރައީސް އޮފީހުގެ ލީގަލް އެފެއާޒް މިނިސްޓަރު އާއިޝަތު އާޒިމާ ޝަކޫރު ފުރާވަޑައިގަންނަވަން އުޅުއްވާ ކަމުގެ އަޑުތައް ވެސް ފެތުރުނެވެ. އެހެން ނަމަވެސް އާޒިމާ ވަނީ އެވާހަކަތައް ދޮގުކުރައްވާފައެވެ.