ސޯޝަލް މީޑިޔާ ދިވެހިންގެ ތެރެއިން ގިނަ ބަޔަކު ބޭނުން ކުރާއިރު ކޮންމެ ކަމަކަށް ވެސް މަޖާޒީ ގޮތެއްގައި ފާޑުކިޔުމަކީ ވަރަށް އާންމުވެފައިވާ ކަމެކެވެ. ސިޔާސީ ކަންކަމަށް ވަރަށް ސީރިއަސް ބަޔަކު ސޯޝަލް މީޑިޔާގައި ހަރަކާތްތެރިވާއިރު ކޮންމެ ކަމަކަށް ވެސް އެމީހުންގެ އަތުގައި ސިޔާސީ ރައްދެއް އޮވެއެވެ.
ސޯޝަލް މީޑިޔާގައި ހަރަކާތްތެރިވާ "ސިޔާސީ ނޫން" މީހުންގެ ފާޑުކިޔުންތައް އަންނަނީ މުޅިން އެހެން ގޮތަކަށެވެ. ރަށެއްގެ ބަނދަރު ހަދަން ސަރުކާރުން ނިންމާ ގޮތަަށް އެމީހުން ފާޑުކިޔާނީ ކޮންމެވެސް ފިލްމެއް ނުވަތަ ސީރީސް އެއްގެ މަންޒަރަކާއި ގުޅުވައިގެންނެވެ.
މިފަހަރު ވެސް މިއޮތީ އެކަހަލަ ކަމެއް ފެންމަތިވެފައެވެ. ސުޕްރީމް ކޯޓުން ރޭ ނެރުނު ހުކުމާއި އެކު ރައީސް ޔާމީންގެ ސަރުކާރަށް ބޮޑެތި ގޮންޖެހުންތަކާއި ކުރިމަތިލާން ޖެހިފައިވާއިރު ސޯޝަލް މީޑިޔާގައި "ސިޔާސީ ނޫން" މީހުންގެ ފާޑުކިޔުން އައީ ވަރަށް ތަފާތު ގޮތަކަށެވެ.
އެމީހުން ދަނީ ރައީސް ޔާމީން އަށް ހެއްދެވުނު ގޯހަކީ ސުޕާރީ އަގުބޮޑު ކުރުންތޯ ސުވާލުކުރަމުންނެވެ. ސުޕާރީ އަކީ ދިވެހިންގެ މެދުގައި ވަރަށް މަގްބޫލު އެއްޗަކަށް ވާއިރު އެކަމާއި އެއްބަސްވާ މީހުން ވެސް މަދެއް ނޫނެވެ.
ސަބަބެއް ކަމަށް އެމީހުން ފާހަގަކުރަނީ ދިވެހިރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް މުހައްމަދު އަމީން ދީދީގެ ވެރިކަން ނިމުމަކަށް އައި ގޮތެވެ.
އަމީން ދީދީގެ ވެރިކަމާއި ދެކޮޅަށް ގިނަ ބަޔަކު ނިކުތް ސަބަބުތަކުގެ ތެރޭގައި ރާއްޖޭގައި ދުންފަތް މަނާކުރައްވަން މަސައްކަތް ކުރެއްވުން ހިމެނެއެވެ. އެހެންވެ ރައީސް ޔާމީން އަށް މިވަގުތު ސިޔާސީ ގޮތުން ގޮންޖެހުންތަކެއް ކުރިމަތިވި ސަބަބަކީ ސުޕާރީ އަގުބޮޑު ކުރުން ކަމަށް އެމީހުން ބުނަނީއެވެ.
ހޯލްސޭލް ފިހާރަތަކުން މީގެ ކުރިން ރަސިލީ ސްޕާރީ ކޭހެއް މީގެ ކުރިން 1050 ރުފިޔާއަށް ގަންނަން ލިބުނު ނަމަވެސް މިހާރު ރަސިލީ ސުޕާރީ ކޭހެއް ލިބެނީ 1500 ރުފިޔާއަށެވެ.
ރަސިލީ ސްޕާރި ހޯލްސޭލްކޮށް ގަންނަން ލިބޭ އަގު ބޮޑުކޮށްފައި ވަނީ ސަރުކާރުން އެޅި ފިޔަވަޅަކާއި ގުޅިގެނެއް ނޫނެވެ.