ސުޕްރީމް ކޯޓުން ނެރުނު އަމުރު ތަންފީޒު ކުރާނެ ކަމަށް ފުރަތަމަ ބުނުމަށްފަހު ފަހުން އެއަމުރު ތަންފީޒު ކުރުމަށް އެޓާނީ ޖެނެރަލް އަދި ޕްރޮސެކިއުޓާ ޖެނެރަލްއާ ވާހަކަ ދައްކައި، މަޝްވަރާ ކުރަމުން ދާ ކަމަށް ފުލުހުންގެ މުއައްސަސާއިން ބުނުމުން ކުރީގެ ރައީސް މައުމޫން އަބްދުލްޤައްޔޫމް ކަންބޮޑުވުން ފާޅުކުރައްވައިފިއެވެ.
Supreme Court ge amurah vaguthun amalu kurāne kamuge yaqīn kan rē @PoliceMv in dhīfa mirē ehen gothakah bunīthī hithāma kuran. SC in kurā hukumakah amalu kurumugai ehen evves farāthakā mashwarā kuākah nujehē
— Maumoon Abdul Gayoom (@maumoonagayoom) February 2, 2018
މައުމޫން ކުރެއްވި ޓުވީޓެއްގައި ވިދާޅުވެފައިވަނީ ސުޕްރީމް ކޯޓުގެ އަމުރު ވަގުތުން ތަންފީޒު ކުރާނެ ކަމަށް ވިދާޅުވުމަށްފަހު ރޭ އެހެން ގޮތަކަށް އެވާހަކަ ބުނީތީ ހިތާމަ ކުރާ ކަމަށެވެ. އަދި ސުޕްރީމް ކޯޓުން ކުރާ ހުކުމަކަށް އަމަލު ކުރުމަށް އެހެން އެއްވެސް ފަރާތަކާއި މަޝްވަރާ ކުރަން ނުޖެހޭ ކަމަށް މައުމޫން ވިދާޅުވެފައިވެއެވެ.
Press Statement: PMC/2018/02 pic.twitter.com/2I0yuSWrrU
— Maldives Police (@PoliceMv) February 2, 2018
ސުޕްރީމް ކޯޓުން ސިޔާސީ ހައްޔަރީންގެ ގޮތުގައި ތިބި 9 ލީޑަރަކު މިނިވަން ކުރުމަށް ހުކުމް ކުރިތާ 30 ގަޑިއިރަށްވުރެ ގިނައިރު ވެފައިވާއިރު އަދިވެސް ސަރުކާރުން އެ ހުކުމް ތަންފީޒު ކޮށްފައި ނުވާތީ އިދިކޮޅު ފަރާތްތަކުން ގެންދަނީ އިހުތިޖާޖު ކުރަމުންނެވެ.
ސަރުކާރަށް ބޭރުގެ އެކި ފަރާތްތަކުގެ ޕްރެޝަރުތައް، އަމުރު ތަންފީޒު ކުރުމަށް ކުރިމަތި ވަމުން އައި ނަމަވެސް، ދައުލަތުގެ ކަންބޮޑުވުންތަކެއް ހުރި ކަމަށް ބުނެ ސަރުކާރުން ވަނީ ހުކުމް ތަންފީޒުކުރުން ލަސްކޮށްފައެވެ.
އިއްޔެ ބަންޑާރަ ނައިބު އަނިލް ވިދާޅުވެފައިވަނީ ދައުލަތުގެ ކަންބޮޑުވުންތައް އުއްތަމަ ފަނޑިޔާރަށް ހުށައަޅާފައިވާ ކަމަށާއި ގާނޫނީ އިމުގެ ތެރެއިން ކަންތައް ކުރެއްވުމަށް އުއްތަމަ ފަނޑިޔާރު އިރުޝާދު ދީފައިވާ ކަމަށް އަނިލް ވިދާޅުވިއެވެ.