އިލެކްޝަންްސް ކޮމިޝަނުން ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ގެއްލިފައިވާ ކަމަށް ކަނޑައަޅާފައިވަނިކޮށް ބުރާސްފަތި ދުވަހު ސުޕްރީމް ކޯޓުން އެނިންމުން ބާތިލުކުރުމާއެކު ރައްޔިތުންގެ މަޖިލީހުން ސުޕްރީމް ކޯޓުގެ އަމުރަށް އަމަލު ކުރަން ފަށައިފި އެވެ.
މަޖިލީހުގެ އަމީން އާންމު ވަނީ އީސީން 12 މެމްބަރުންގެ ގޮނޑި ގެއްލިފައިވާ ކަމަށް ކަނޑައެޅި 12 މެމްބަރުންނަކީވެސް ސުޕްރީމް ކޯޓުގެ ހުކުމާ އެއްގޮތަށް މަޖިލީހުގެ މެމްބަރުން ކަން ގަބޫލުކުރައްވާފައި ކަމަށް "މިހާރު" ނޫހުން ރިޕޯޓުކޮށްފައިވެއެވެ.
އެހެންކަމުން މިހާރު ރައްޔިތުންގެ މަޖިލީހުގެ މެޖޯރިޓީ ސަރުކާރަށް ގެއްލި، އިދިކޮޅު އިއްތިހާދަށް ވަނީ މެޖޯރިޓީ ލިބިފައެވެ. ސުޕްރީމް ކޯޓުން ވަނީ ޕާޓީ ބަދަލުކުރިޔަސް މެމްބަރެއްގެ ގޮނޑި ނުގެއްލޭނެ ކަމަށް ހުކުމްކޮށްފައެވެ.
އިދިކޮޅު ފަރާތްތަކުން ވަނީ ސަރުކާރު ކޯލިޝަންވެސް ބައިބައި ވަމުންދާ ކަމަށާއި ވަރަށް އަވަހަށް ސަރުކާރުގެ ދެ މެމްބަރަކު ތާއީދު އަނބުރާ ނަންގަވައި، އިދިކޮޅު ފަރާތްތަކާއި ގުޅިވަޑައިގަންނަވާނެ ކަމަށެވެ. ނަމަވެސް ޕީޕީއެމް-އެމްޑީއޭ ކޯލިޝަނުން މިކަމާ ގުޅޭ ގޮތުން އަދި އެއްވެސް އެއްޗެއް ހާމަކޮށްފައެއް ނުވެއެވެ.