ފުލުހުންގެ އިސް އޮފިސަރުންގެ ތެރެއިން ގިނަ ބޭފުޅުން ބޭނުންވަނީ ސުޕްރީމް ކޯޓުގެ އަމުރު ތަންފީޒު ކުރުމަށް ކަމަށް ގަލޮޅު ދެކުނު ދާއިރާގެ މަޖިލިސް މެންބަރު އަހްމަދް މަހްލޫފް ވިދާޅުވެއްޖެއެވެ.
މަހްލޫފް މިހެން ވިދާޅުވެފައިވަނީ، "ފުލުހުންގެ ސަފުތައް ރުކުރުވާލާފައިވާ" ކަމަށް ބުނެ ފުލުހުން މިއަދު އާއްމުކުރި ފޮޓޯއަކަށް ރައްދު ދެއްވައި ކުރެއްވި ޓްވީޓެއްގައެވެ.
މަހްލޫފް ވިދާޅުވި ގޮތުގައި ފުލުހުންގެ ސަފުތައް އަބަދުވެސް އޮންނަނީ ރުކުރުވާލާފައި ކަމަށެވެ. އެހެން ނަމަވެސް ރޭ ބޭއްވި ބައްދަލުވުމުގައި ވެސް މެޖޯރިޓީ އޮފިސަރުން ވިދާޅުވެފައި ވަނީ އަމުރު ތަންފީޒު ކުރަން ޖެހޭ ކަމަށް މަހްލޫފް ވިދާޅުވިއެވެ.
ރާއްޖޭގެ ޤާނޫނު އަސާސީ ބުނާ ގޮތުން ސުޕްރީމް ކޯޓުގެ އަމުރަށް ފުލުހުން ތަބާވާން ޖެހެއެވެ. އެހެން ނަމަވެސް ސުޕްރީމް ކޯޓުގެ އަމުރަށް އަމަލު ނުކުރަން ތަފާތު އެކި އުޒުރުތައް ބަންޑާރަ ނައިބު އަނިލް ގެންދަވަނީ ދައްކަވަމުންނެވެ.
އަދި އަނިލް އަންގަވާ ގޮތަކަށް އަމަލު ކުރައްވާނެ ކަމަށް ފުލުހުންގެ އިދާރާ ހިންގެވުމާއި ހަވާލުވެ ހުންނެވި އެސިސްޓަންޓް ކޮމިޝަނަރ އޮފް ޕޮލިސް އަބްދުﷲ ނަވާޒް ވަނީ ވިދާޅުވެފައެވެ.