ސުޕްރީމް ކޯޓުގެ އަމުރު ތަންފީޒު ކުރެވެން ނެތް ކަމަށް ރައީސް އަބްދުﷲ ޔާމިން ސުޕްރީމް ކޯޓަށް އަންގަވައިފިއެވެ.
މިކަން އިއުލާން ކުރައްވާފައި ވަނީ ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ އެވެ.
އާޒިމާ ވިދާޅުވި ގޮތުގައި ސުޕްރީމް ކޯޓުން ނިންމާފައިވާ ނިންމުންތަކާ ގުޅިގެން ރައީސް އަބްދުﷲ ޔާމިން ވަނީ ތިން މައްސަލައެއް ސުޕްރީމް ކޯޓަށް ހުށަހަޅާފަ އެވެ.
ރައީސް ޔާމީން ސުޕްރީމް ކޯޓަށް ހުށަހަޅުއްވާފައިވާ ފުރަތަމަ ސިޓީ:
އަދުލްއިންސާފު ގާއިމު ކުރުމުގެ ބާރުގައި ހިމެނޭ ކޮންމެ މީހެއްގެ މައްޗަށް ޖުޑީޝަލް ސާރވިސް ކޮމިޝަން (ޖޭއެސްސީ)ގެ އިހުތިސާސް ހިނގާނޭކަމުގައި ސަރީހަ އިބާރާތުން ގާނޫނުއަސާސީގައި ބަޔާންކޮށްފައިވާއިރު، ސުޕްރީމް ކޯޓުގެ އަމުރުގައި ޖޭއެސްސީއަށް ސުޕްރީމް ކޯޓުގެ ފަނޑިޔާރުންގެ މައްސަލައެއް ބެލުމުގެ ބާރު ލިބިދީފައިނުވާކަމަށް ކަނޑައަޅާފައިވާ ކަނޑައެޅުމަކީ އެކޮމިޝަންގެ މަސައްކަތައް އެރަސް އެޅޭ ކަމެއް. މިއީ ސުޕްރީމް ކޯޓަށް ވިޔަސް ލިބިދީފައިވާ ބާރަކަށް ނުވާތީ، ޖޭއެސްސީގެ މަސައްކަތްތައް ކުރިއަށް ގެންދެވޭނެ ގޮތެއްގެ މަތީން ކޯޓުގެ އަމުރު ބަދަލު ކޮށްދެއްވުމަށް އެދިވަޑައިގަންނަވާ.
ރައީސް ޔާމީން ސުޕްރީމް ކޯޓަށް ހުށަހެޅުއްވި ދެވަނަ ސިޓީ:
ސުޕްރީމް ކޯޓުގެ އަމުރުގައި މިނިވަން ކުރުމަށް އަމުރުކޮށްފައިވާ 09 މީހުންގެ މިނިވަން ކުރުމުގެ މައްސަލަ. މިކަމާ ގުޅިގެން ޝަރުއީ މަރުހަލާގެ ހުރިހާ ކޯޓަކުން ނިންމައި، ހުކުމް ކޮށްފައިވާ މައްސަލަތަކެއް ކަމަށާއި އެ މައްސަލަތަކުގެ ހުކުމްތައް ބާތިލު ކުރުމެއް ނެތި، ދަށު ކޯޓަކުން ބެލުމަށް އަމުރުކޮށް، އެކަން ނުކޮށްފި ބަޔަކީ ޖިނާއީ ކުށްވެރިންކަމުގައި ދޭހަވާ ގޮތަށް ކަނޑައަޅުއްވައި، ޝަރުއީ ފަހު މަރުހަލާއާ ހަމައިން ހުކުމްކޮށްފައިވާ މީހުންނާއި، އަދި ޝަރުއީ އެކިއެކި މަރުހަލާގައި މައްސަލަތައްހުރި މީހުންނާއި ތަހުގީގު މަރުހަލާގައި މައްސަލަތައް ހުރި މީހުން ހިމެނޭ ގޮތަށް އެތައް ކުށްވެރިންނެއް، ވަގުތުން ދޫކޮށްލުމަށް ސުޕްރީމް ކޯޓުގެ އަމުރުގައިވާ ކަމަށެވެ. އެކަމުގެ ސަބަބުން ގާނޫނުއާސާސީއާ ގާނޫނު ހަމަތަކުގެ ތެރެއިން، އެ އަމުރު ތަންފީޒު ކުރެވިދާނޭ ކަމަށް ގަބޫލު ނުކުރެއްވޭތީ، އެމައްސަލަތަކަށް ގާނޫނުއަސާސީ އާއި ގާނޫނުތަކުގެ ތެރެއިން ކަންކަން ކުރެއްވޭނެ ގޮތްތައް ކަނޑައަޅުއްވައި ދެއްވުމަށް ވެސް ރައީސް ޔާމީން އެދިވަޑައިގެންފައިވޭ.
.
ރައީސް ޔާމީން ސުޕްރީމް ކޯޓަށް ހުށަހެޅުއްވި 3 ވަނަ ސިޓީ:
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ އެޑްމިނިސްޓްރޭޓަރު ހަސަން ސައީދު ހުސައިން ހައްޔަރު ކުރުމަށް ކްރިމިނަލް ކޯޓުން ނެރެފައިވާ އަމުރު ބާތިލް އެމައްސަލައިގެ ފައިލް ސުޕްރީމް ކޯޓަށް ގެންދިއުމަށް ސުޕްރީމް ކޯޓުން ކުރި އަމުރަކީ އެ މައްސަަލަ ތަހުގީގު ހުއްޓި، ފުލުހުންނާއި ޕްރޮސެކިއުޓަރ ޖެނެރަލްގެ ގާނޫނީ ޒިންމާ އަދާކުރުމަށް ހުރަސްއެޅިފައިވާ ކަމަށް ވަނީ ފާހަގަކުރައްވާފައެވެ.