ހުޅުމާލޭގައި އަލަށް ހެދި 704 ފްލެޓްގެ ތެރެއިން، ފްލެޓް ލިބުނު މީހުންގެ ލިސްޓް ސަރުކާރުން ސިއްރުކޮށްގެން އުޅެނިކޮށް އެ ލިސްޓް ލީކު ކޮށްލައިފިއެވެ.
ފްލެޓް ލިބުނު މީހުންގެ މައުލޫމާތު އާއްމު ކުރުމުގެ ބަދަލުގައި ހައުސިން މިނިސްޓްރީން އާއްމުކޮށްފައި ވަނީ ފްލެޓް ލިބުނު މީހުންނަކީ ކޮން ބައެއް ކަން ނޭނގޭ ގޮތަށް، ހަމައެކަނި ފޯމު ނަމްބަރުތަކާ އެކުގަ އެވެ.
ހައުސިން އިން އާއްމުކުރި ލިސްޓުން ފްލެޓް ލިބުނު މީހުންނަށް ލިބުނީ ކިތައް ޕޮއިންޓުން ކަމެއް ވެސް ނޭނގެ އެވެ.
ސޯޝަލް މީޑިޔާގައި ލީކް ކޮށްލާފައިވާ ފްލެޓް ލިސްޓަށް ބަލާއިރު ފްލެޓް ލިބުނު މީހުންގެ ނަމާއި އެޑްރެސް އަދި ފޯމް ނަމްބަރާއި އައިޑީ ކާޑު ނަމްބަރު ވެސް ހިމަނާފައިވެ އެވެ.
ފްލެޓަށް ހައްގުވާ 259 މީހަކު އެ ލިސްޓުން އުނިކުރި އިރު ފްލެޓް ލިބުމުގެ ޝަރުތު ހަމަނުވާ 261 މީހަކަށް ފްލެޓް ދީފައިވާކަން ފާހަގަކުރެވެއެވެ.
އަދި މީގެ އިތުރުން "މިނިސްޓަރުންގެ ލިސްޓް"ގެ ގޮތުގައި ހިމަނާފައިވާ ބަޔަކަށް ވެސް ފްލެޓް ދީފައިވާ ކަން ވަނީ ފަޅާއަރާފައެވެ. "މިނިސްޓަރުންގެ ލިސްޓް" ގައި ހިމެނެނީ ފްލެޓަށް ޝަރުތު ހަމަނުވި ނަމަވެސް ފްލެޓް ދީފައިވާ މީހުންނެވެ.