ކުރީގެ ރައީސް މައުމޫން އަބްދުލްޤައްޔޫމް ޖަލުގައި ބަންދުކުރެވިފައި ވާއިރު، އެ މަންޒަރު ބައްލަވަން މައުމޫނުގެ ދަރިކަނބަލުން ދުންޔާ އާއި ހަގު ދަރިކަލުން ޣައްސާން ތިއްބަވާތީ އެ ދެބޭފުޅުންނަށް ގިނަ ބައެއްގެ ފާޑުކިޔުންތައް އަމާޒުވެއްޖެއެވެ.
މައުމޫން ބަންދުކޮށްފައިވާތާ 24 ގަޑިއިރު ވެގެން ގޮސްފައިވާއިރު، އެކަމާއި ގުޅިގެން ސީދާ ގޮތެއްގައި ދުންޔާ އެއްވެސް ވާހަކައެއް ވިދާޅެއް ނުވެއެވެ. ދުންޔާ ކުރައްވާ އެކި ޓްވީޓްތަކުގައި ވިދާޅުވަމުން ގެންދަވަނީ "ޤައުމީ މަސްލަހަތު އިސްކުރަން ޖެހޭ" ވާހަކައެވެ.
މައުމޫނުގެ ހަގު ދަރިކަލުން ޣައްސާންގެ ފަރާތުން މައުމޫން ހައްޔަރުކުރިފަހުން އެއްވެސް ވާހަކަފުޅެއް މިހާތަނަށް ދައްކަވާފައެއް ނުވެއެވެ. އަދި މައުމޫން ހައްޔަރުކުރެވުނު ރޭ ވެސް އެންދެރިމާގެއިން ޣައްސާން ފެނިފައެއް ނުވެއެވެ.
އެހެން ނަމަވެސް މައުމޫން ހައްޔަރު ކުރުމާއި ގުޅިގެން އެކަމާއި މައުމޫނުގެ ދަރިކަނބަލުން ޔުމްނާ މައުމޫނު ގެންދަވަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ. އިދިކޮޅު ފަރާތްތަކާއި އެކު ވެސް މަސައްކަތް ކުރައްވަމުން ގެންދަވާ ޔުމްނާގެ ފިރިކަލުން ނަދީމް ވެސް ވަނީ ރޭގެ ވަގުތެއްގައި ފުލުހުންގެ ބެލުމުގެ ދަށަށް ގެންގޮސްފައެވެ.
ފިރިކަލުން ބަންދުކުރެވުނު ނަމަވެސް ޔުމްނާގެ ހިތްވަރަށް ބަދަލެއް ނާންނަ ކަމަށް ބުނެ ސޯޝަލް މީޑިޔާގައި އެތައް ބަޔަކު ދަނީ ތައުރީފް ކުރަމުންނެވެ.
މައުމޫނުގެ އުމުރުފުޅުން 81 އަހަރު ވެފައިވާއިރު އެމަނިކުފާނު ޖަލުގައި ބަންދުކުރުން ސިޔާސީ ފަރާތްތަކުން ސިފަކުރަމުން ގެންދަނީ ރައީސް ޔާމީންގެ އަނިޔާވެރިކަން ހައްދުން ނެއްޓުނު ކަމުގެ ހެއްކެއްގެ ގޮތުގައެވެ.