އަންނަ ހުކުރު ދުވަހު އަކްޝޭ ކުމާރްގެ "ޕެޑްމޭން" ސިނަމާތަކަށް ގެންނަން ތައްޔާރުވެފައި ވަނިކޮށް، އޭނާގެ އިތުރު ފިލްމެއްގެ ޓީޒާ ޓްރެއިލާއަކުން ފޭނުންނަށް އުފާވެރިކަން ގެނެސް ދީފި އެވެ.
އެ ފިލްމަކީ އިންޑިއާގެ މިނިވަން ދުވަހާ ދިމާކޮށް އޮގަސްޓް 15 ގައި ރިލީޒް ކުރަން ނިންމާފައިވާ "ގޯލްޑް" އެވެ. މި ފިލްމަކީ "ހަނީމޫން ޕްރައިވެޓް ލިމިޓެޑް" ފަދަ ފިލްމްތައް ލިޔެ، ޑައިރެކްޓްކޮށްފައިވާ ރީމާ ކަތުގީ، ލިޔެ، ޑައިރެކްޓްކޮށްފައިވާ ފިލްމެކެވެ.
އަދި މި ފިލްމަކީ އާމިރް ހާނާއި ރާނީ މުކަރްޖީ އަދި ކަރީނާ ކަޕޫރް ލީޑް ރޯލުން ފެނިގެން ދިޔަ 2012 ގެ "ތަލާޝް" އަށް ފަހު ރީމާ ޑައިރެކްޓް ކުރި ފުރަތަމަ ފިލްމެވެ.
"ގޯލްޑް" ބިނާކޮށްފައި ވަނީ އިންޑިއާ އަށް 1947 ގައި މިނިވަންކަން ލިބުމަށް ފަހު ޖެހިގެން އައި އިރު އޮލިމްޕިކްގައި ވާދަކޮށް ހޮކީން ފުރަތަމަ ރަން މެޑެލް ހޯދަން ކުރި ކާމިޔާބު އަދި ފަހުރުވެރި މަސައްކަތުގެ މައްޗަށެވެ.
އަކްޝޭއާ އެކު "ގޯލްޑް" އިން ބަތަލާއެއްގެ ގޮތުގައި ފެނިގެން ދާނީ "ނާގިން" ފަދަ މަޝްހޫރު ޓީވީ ސިލްސިލާތައް ކުޅެފައިވާ މީނީ ރޯއި އެވެ.
އިނގިރޭސިވިލާތުގައި ވަރަށް ބޮޑު ބައި ޝޫޓްކޮށްފައިވާ ފިލްމްގެ އިތުރު ކާސްޓުންގެ ތެރޭގައި އަމިތު ސާދު، ކުނާލް ކަޕޫރް، ވިނީތު ސިންގް އަދި ސަނީ ކޯޝަލް ހިމެނެ އެވެ.
"ޕެޑްމޭން" އާއި "ގޯލްޑް" ގެ އިތުރުން މި އަހަރު ސިނަމާ އަށް އަންނަން ހުރި އަކްޝޭގެ ފިލްމްތަކުގެ ތެރޭގައި ދެން އެންމެ ފާހަގަކޮށްލެވޭ އެއް ފިލްމަކީ އޭނާ ވަރަށް ތަފާތު ކެރެކްޓާއަކުން ފެނިގެންދާ "2.0" އެވެ.