އަޖޭ ދޭވްގަންގެ ކުރިއަށް އޮތް ފިލްމް "ރެއިޑް" ގެ ޓްރެއިލާ މިހާރު ވަނީ އާންމުންނަށް ދޫކޮށްލައިފަ އެވެ. އަންނަ މަހުގެ ތެރޭގައި ސިނަމާތަކަށް ގެންނަން ނިންމާފައިވާ ފިލްމްގެ މައިގަނޑު ވާހަކައަކީ ޓެކްސް އަށް މަކަރު ހަދާ މީހުން ފަޅާއަރުވައިލުމަށް ކުރާ މަސައްކަތެކެވެ.
އެގޮތުން "ރެއިޑް" ގެ މައިގަނޑު ޕްލޮޓް އަމާޒުކޮށްފައި ވަނީ 1981 އިންޑިއާގައި ކުރިއަށް ގެންދިޔަ ދިގުދެމިގެން ދިޔަ ރެއިޑްގެ މައްޗަށެވެ. ހަގީގީ ހާދިސާތަކާ އެކު ފިލްމް ބޮޑު ސްކްރީނަށް އަންނަ އިރު، އަޖޭ ފެނިގެން ދާނީ އިންކަމް ޓެކްސް ޑިޕާޓްމަންޓްގެ ޑެޕިއުޓީ ކޮމިޝަންގެ ރޯލުންނެވެ. އޭނާގެ ކެރެކްޓާގެ ނަމަކީ އަމޭ ޕަޓްނައިކް އެވެ.
"ރެއިޑް" ގައި އަޖޭއާ އެކު ބަތަލާގެ ރޯލުން ފެނިގެން ދާނީ އިލިއާނާ ޑި ކްރޫޒް އެވެ. މިއީ މިދިޔަ އަހަރު ރިލީޒް ކުރި "ބާދްޝާހޯ" އަށް ފަހު އަޖޭ އާއި އިލިއާނާ އެކުގައި ކުޅުނު ދެވަނަ ފިލްމެވެ.
"ގަންޗައްކަރް" އާއި "ނޯ ވަން ކިލްޑް ޖެސިކާ" ފަދަ ފިލްމްތަައް ޑައިރެކްޓްކޮށްފައިވާ ރާޖްކުމާރް ގުޕްތާ ޑައިރެކްޓްކޮށްފައިވާ "ރެއިޑް" ސިނަމާތަކަށް އަންނާނީ އަންނަ މަހުގެ 16 ގަ އެވެ.