ހިންދީ ފިލްމަކަށް ލަވައެއް ރެކޯޑްކޮށްފައިވާ ކަމަށް އިނގިރޭސިވިލާތުގެ މަޝްހޫރު ޒުވާން ލަވަކިޔުންތެރިޔާ ޒޭން މާލިކް ބުނެފި އެވެ.
މަޖައްލާއަކަށް ދިން އިންޓަވިއުއެއްގައި ކުރީގެ ބޭންޑް "ވަން ޑިރެކްޝަން" ގެ ލަވަކިޔުންތެރިޔާ ބުނީ ރެކޯޑް ކުރި ހިންދީ ލަވައަކީ މިހާތަނަށް ހިންދީ ބަހުން އޭނާ ރިކޯޑް ކުރި ފުރަތަމަ ލަވަ ކަމަށެވެ.
"އެ ލަވަ އަށް އެހުންތެރިންގެ ރިއެކްޝަން އަންނާނެ ގޮތެއް ބަލަން ވަރަށް ބޭނުންވެފައި މިހިރީ،" 25 އަހަރުގެ ލަވަކިޔުންތެރިޔާ ބުންޏެވެ.
ނަމަވެސް ހިންދީ ލަވައެއް ރެކޯޑް ކުރީ ކޮން ބައެއްގެ، ކޮން ފިލްމަކަށް ކަމެއް މިހާރު ސޯލޯ އާޓިސްޓެއްގެ ގޮތުގައި މަސައްކަތް ކުރާ ޒޭން ނުބުނެ އެވެ.
މިދިޔަ އަހަރު ނެރުނު ސޯލޯ އަލްބަމް "މައިންޑް އޮފް މައިން" އަށް ފަހު، ޒޭން މިހާރު އަންނަނީ ދެވަނަ އަލްބަމެއްގެ މަސައްކަތް ވެސް ކުރަމުންނެވެ. އޭނާ ބުނީ މި އަލްބަމްގެ އެއް ލަވައިގައި އޮސްކާ ހާސިލްކޮށްފައިވާ އިންޑިއާގެ ކޮމްޕޯޒަރު އޭއާރް ރަހްމާނާ އެކު މަސައްކަތްކޮށްފައިވާ ކަމަށެވެ.
"އާ އަލްބަމްގައި އުރުދޫ ރަހަ ވަރަށް ބޮޑަށް ހިމެނޭނެ. އެގޮތުން ގައްވާލީ އާއި ބަންގްރާ ފަދަ މިއުޒިކްގެ ރަހަތައް އާ އަލްބަމްގައި ހުންނާނެ،" ޒޭން ބުންޏެވެ.