ފެބްރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރަށް ފަހު ރައީސް އަބްދުﷲ ޔާމީން އެދިވަޑައިގަތުމުން ވެސް އެމަނިކުފާނާއި އެކު މަޝްވަރާ ކުރަން އުއްތަމަ ފަނޑިޔާރު ދެކޮޅު ހެއްދެވުމަކީ ސުޕްރީމް ކޯޓު ޗާޓުން ބޭރުވުން ގޮތުގައި ޔޫތް މިނިސްޓަރ އިރުތިޝާމް އާދަމް ސިފަކުރައްވައިފިއެވެ.
ޕީޕީއެމްގެ "ރުމާލު2" ޖަގަހައިގައި ވާހަކަ ދައްކަވަމުން އިރުތިޝާމް ވިދާޅުވީ، ސުޕްރީމް ކޯޓަށް ރައީސް ޔާމީން ހުށަހެޅުއްވި ސިޓީތަކަށް ޖަވާބު ނުދެއްވުމުން ދޭހަވީ، އެންމެ މަތީ ކޯޓަށް ވިޔަސް އެ ކޯޓު "ޗާޓުން ބޭރުވެފައިވާ ކަން" ކަމަށެވެ.
އިރުތިޝާމް ވިދާޅުވީ ސުޕްރީމް ކޯޓުގެ އަމުރަށް ފަހު މާލޭގައި އެއްވެސް ގޮތަކަށް "ލޭ އޮހޮރުވުމާއި އެއްވެސް ގޮތަކަށް ސުލްހަ މަސްލަސް ކަން ނަގާނުލައްވައި ރައީސް ޔާމީން މަސައްކަތް ކުރެއްވީ މަޝްވަރާ ކުރެއްވުމަށް، މީޑިއޭޓް ކުރެއްވުމަށްޓަކައި" ކަމަށެވެ. އެހެން ނަމަވެސް އެ މަޝްވަރާއަށް ސުޕްރީމް ކޯޓުން އިޖާބަ ނުދެއްވި ކަމަށެވެ.
ރައީސް ޔާމީން އަށް ވަރަށް ބޮޑަށް ތައުރީފް ކުރައްވައި ވާހަކަ ދައްކަވަމުން އިރުތިޝާމް ވިދާޅުވީ، އަދި 1 ފެބްރުއަރީގައި ރާއްޖެ ގެންނަން އުޅުނު ބަޣާވާތެއް ނާކާމިޔާބުވީ، ރައީސް ޔާމީންގެ ކުޅަދާނަކަމާއި ވިސްނުންފުޅުން ކަމަށެވެ.