ރޭ ޕީޕީއެމްގެ "ރުމާލު2" ޖަގަހައިގައި ވާހަކަ ދައްކަވަމުން ވިލިފުށީ ދާއިރާގެ މަޖިލިސް މެންބަރު ރިޔާޒް ރަޝީދު ސިފަކުރެއްވި ގޮތުގައި، ޕީޕީއެމްގެ ނައިބު ރައީސް އަބްދުއްރަހީމް އަކީ ސައްދާމް ހުސައިންގެ ވެރިކަމުގައި އިރާގުގެ އިންފޮމޭޝަން މިނިސްޓަރު ކަމުގައި ހުންނެވި މުހައްމަދު ސައީދު އައްސަހާފު ފަދަ ބޭފުޅެއް ކަމަށެވެ.
ރިޔާޒު ވިދާޅުވި ގޮތުގައި ޕީޕީއެމްގައި އެފަދަ ވަރަށް ގިނަ "ސައްހާފުން" އެބަތިއްބެވެ. އެކަމާއި ރިޔާޒު ވަރަށް ފަޚުރުވެރިވެ ވަޑައިގަންނަވައެވެ.
ރިޔާޒު މިސާލު ޖެއްސެވި އިރާގުގެ ކުރީގެ އިންފޮމޭޝަން މިނިސްޓަރު މުހައްމަދު ސައީދު ސައްހާފް ވެސް ސައްދާމު ހުސައިންގެ ވެރިކަމުގެ ފަހުކޮޅު އޭނާގެ ސަރުކާރުގެ ދިފާއުގައި ދޮގުހަދައި ހަގީގަތް ފޮރުވަން ބުރަ މަސައްކަތްތަކެއް ކުރި މީހެކެވެ.
2003 ވަނަ އަހަރު އިރާޤަށް އެމެރިކާ ސިފައިން އަރައިގެން އުޅުނު އިރު ސައްޙާފް ކޮންމެ ދުވަހަކު ވެސް ނޫސް ކޮންފަރެންސެއް އޭރު ކަންތައް ވަމުން ދިޔަ ގޮތާއި ދިމާ އިދިކޮޅަށް ދުނިޔެއަށް ކިޔައިދެއްވަމުން ގެންދެވިއެވެ. އެގޮތުން އެމެރިކާ ސިފައިން އިރާގުގެ ވެރިރަށް ބަޣްދާދުގެ ރަށް ބޭރާއި ހިސާބަށް ވާސިލުވި އިރުވެސް ސައްހާފް ވިދާޅުވަމުން ދިޔައީ، "އިރާގު ސިފައިން ނިކުމެ އެމެރިކާ ސިފައިންގެ ބޮލުގެ އިސްތަށި އުފުރަމުންދާ" ކަމަށެވެ. ސައްދާމު ހުސައިންގެ ހިތްވަރުގަދަ ވާހަކަ އާއި ރައްޔިތުން ސައްދާމު ހުސައިންގެ ފަހަތުގައި ތިބި ވާހަކަ ވެސް މެއެވެ.
ސައްހާފުގެ ހަގީގަތެއް ނެތް ވާހަކަތައް ދުނިޔޭގެ ކަންކޮޅުތަކުގައި ގިނަ ބަޔަކު ބަލަމުން ގެންދިޔަ އެވެ. އެހެނަސް އެއީ ސައްހާފުގެ މޮޅުކަމުގެ ސަބަބުންނެއް ނޫނެވެ. އެވާހަކަތައް ޤަބޫލުކުރާތީއެއް ވެސް ނޫނެވެ. މުނިފޫހިފިލުވުމުގެ ގޮތުންނެވެ.
ދިވެހިރާއްޖެ އަށް ބަލާއިރު ވެސް، ޕީޕީއެމްގެ ސަރުކާރުގެ ދިފާއުގައި އަބްދުއްރަހީމް އާއި ރިޔާޒު މެން ފަދަ ބޭފުޅުން ދައްކަވާ ވާހަކަތަކަށް މީހުން ފާޑުކިޔައި ހަދަނީ ހަމަ އެބީދައިންނެވެ.
ރައީސް ޔާމީންގެ ސަރުކާރު ކަރުތާ ފެނުގައި އޮންނަ ދަނޑިވަޅުތަކުގައި، ސަރުކާރުގެ ދިފާއުގައި ކަމަށް ދެއްކެން ވެގެން ޕީޕީއެމްގެ "ސައްހާފުން" ދައްކަވާ ވާހަކަތަކުން ރައީސް ޔާމީނުގެ ހިތްޕުޅަށް ފަހަރުގައި ތަސައްލީ އެއް ލިބިވަޑައިގެންފާނެއެވެ.
އެހެނަސް އޭގެ ސަބަބުން ރައްޔިތުންގެ ހިތްތަކުގައި ސަރުކާރާއި މެދު ނަފްރަތު އިތުރުވުން ނޫން ކަމެއް ނުވެއެވެ.
ސަރުކާރު ގުޑުގުޑުއަޅާވަރުން 5 ދުވަހުގެ ތެރޭގައި އެންމެ 6 ގަޑިއިރު ވެސް ނިދިކުރެއްވުމުގެ ފުރުސަތެއް ލިބިވަޑައި ނުގެންނެވި ކަމަށް ރައީސް ޔާމީން ވަނީ ވިދާޅުވެފައެވެ. އެހެން ނަމަވެސް އެވާހަކަ ނުދައްކަވައި ޕީޕީއެމްގެ "ސައްހާފުން" ދައްކަވަމުން ގެންދެވީ ސަރުކާރުގެ ސާބިތުކަމުގެ ވާހަކައެވެ.
ދުވާލު ހަތަރު ދަމު ޕްރެސް ކޮންފަރެންސް ބާއްވައިގެން ޕީޕީއެމްގެ "ސައްހާފުން"ގެ ފަރާތުން ފެންނަމުން ދަނީ އެއް "ސައްހާފަށް" ވުރެ މޮޅު ވާހަކައެއް ދެއްކޭތޯއެވެ.
އިރާގުގެ އިތުރުން ދުނިޔޭގެ ތާރީޚުގައި އެންމެ އަނިޔާވެރި ވެރިންގެ ލިސްޓުގައި ހިމެނޭ ހިޓްލަރުގެ ޒަމާނުގައި ވެސް "ސައްހާފެއް" އުޅުއްވިއެވެ. ހިޓްލަރުގެ ދިފާއުގައި ވާހަކަ ދައްކަމުން ދިޔަ ގޮއެބަލްސްއޭ ކިޔުނު މީހާގެ ފަރާތުން ފެންނަ މަންޒަރުތަކާއި ދިމާއިދިކޮޅަށް ވާހަކަދައްކައި އެއީ ހަގީގަތެއްނޫންކަމަށް ދައްކަން އުޅުނު ތަނެވެ.
އިރާގަށް އެމެރިކާ ސިފައިން އަރައި، އެގައުމުގެ "ސައްހާފަކީ" ބޯހަމަނުޖެހޭ މީހެއް ކަމަށް ބުނެ އޭނާ ދޫކޮށްލިޔަސް ޕީޕީއެމްގެ ތެރޭގައި ތިއްބެވި ސައްހާފުންގެ މައްޗަށް ކޮރަޕްޝަނުގެ ބޮޑެތި ތުހުމަތު ކުރެވެއެވެ. އިރާގުގެ ސައްހާފަކީ ހަމަނުޖެހޭ މީހަކަށް ބަލައިގެން އެމެރިކާއާއި އިނގިރޭސިވިލާތުން އޭނާ ދޫކޮށްލިޔަސް ދިވެހި ރައްޔިތުން ޕީޕީއެމްގެ "ސައްހާފުން"ގެ މައްސަލަ ބަލާނެއެވެ.