ބޮލީވުޑްގެ އޭ ލިސްޓް ތަރިންނަކީ ބިރުވެރި ފިލްމްތަކާ ވަރަށް ދުރު ބައެކެވެ. އެކަމަކު ބަތަލާ އަނުޝްކާ ޝަރްމާ ތައްޔާރުވަމުން މި އަންނަނީ ފަހަރުގައި ބިރުވެރި ފިލްމްތަކަށް އިންގިލާބެއް ގެންނަން ކަމަށް ވެސް ވެދާނެ އެވެ.
އޭނާ ޕްރޮޑިއުސްކޮށް، ބަތަލާގެ ރޯލް ކުޅެފައިވާ ފިލްމް "ޕަރީ" ގެ ދެތިން ޕްރޮމޯ ކްލިޕެއް ބެލުންތެރިންނަށް ދޫކޮށްލުމަށް ފަހު، މިހާރު މިއޮތީ ފިލްމްގެ ޓީޒާ ޓްރެއިލާ ދައްކާލައުފަ އެވެ.
ޓެގް ލައިނަކަށް "ނޮޓް އަ ފެއަރީ ޓޭލް" ދީފައިވާ "ޕަރީ" އަކީ އަނުޝްކާގެ ވަރަށް ތަފާތު ރޯލެއް ފެނިގެން ދާނެ ފިލްމެކެވެ.
ފިލްމްގެ ޓީޒާ އިން ވެސް ފެންނަ ގޮތުގައި މި ފިލްމްގައި އޭނާ ފެނިގެން ދާނީ ޖިންނި އަވަލާފައި ހުރި މީހެއްގެ ރޯލުންނެވެ.
އާންމުކޮށް ފިލްމްތަކުން ވަރަށް ގްލެމަރަސްކޮށް، އަނުޝްކާ ފެނުނަސް "ޕަރީ" ގައި އޭނާ ބޮޑަށް މޭކަޕެއް ނެތި އަދި ވަރަށް އާދައިގެ ކޮސްޓިއުމްތަކާ އެކުގަ އެވެ.
ކުރިން އަންނަ ހުކުރު ދުވަހު ރިލީޒް ކުރަން ތާވަލް ކުރި "ޕަރީ" ސިނަމާތަކަށް އަންނާނީ އަންނަ މަހުގެ 2 ގަ އެވެ. މި ފިލްމަކީ އަނުޝްކާގެ ޕްރޮޑަކްޝަން ހައުސް ކްލީން ސްލޭޓް އާއި ކްރިއާޖް އެންޓަޓައިންމަންޓް ގުޅިގެން ގެނެސްދޭ ފިލްމެކެވެ.
"ޕަރީ" ގެ ޑައިރެކްޓަރަކީ ޕްރޮސިތު ރޯއި އެވެ. ފިލްމްގެ ކާސްޓުންގެ ތެރޭގައި ޕަރަމްބްރަޓާ ޗެޓަޖީ، ރަޖަތު ކަޕޫރް އަދި ރިއާ ޗަކްރަބަތީ ހިމެނެ އެވެ.