ހޮލީވުޑްގެ ނުފޫޒު ގަދަ ބައެއް މީހުންގެ ފަރާތުން އެތައް ބަޔަކަށް ޖިންސީ ގޯނާތަކާ ކުރިމަތިލާން ޖެހި، އެކަމާ ދެކޮޅަށް މިހާރު އަޑު އުފުލަމުން އަންނަ އިރު، ބޮލީވުޑްގެ ކުރީގެ މަޝްހޫރު އެކްޓަރަކަށް ވެސް ޖިންސީ ގޯނާގެ ތުހުމަތުކޮށްފި އެވެ.
އެއީ "ހިންމަތުވާލާ" އާއި "ކެރަވަން" ފަދަ ކާމިޔާބު އެތައް ފިލްމެއް ކުޅެފައިވާ އެކްޓަރު ޖީތެންތުރާ، 75، އާ ދެކޮޅަށެވެ. ޖީތޭއަކީ ޓީވީ ސިލްސިލާތައް އުފަންދަން މަޝްހޫރު އެކްތާ ކަޕޫރާއި އެކްޓަރު ތުޝާރް ކަޕޫރްގެ ބައްޕަ އެވެ.
މީގެ 47 އަހަރު ކުރިން ޖީތޭގެ ފަރާތުން ޖިންސީ ގޯނާތަކާ ކުރިމަތިލާން ޖެހުނު ކަމަށް އޭނާއާ ދެކޮޅަށް ހިމާޗަލް ޕްރަދޭޝްގެ ފުލުހުންނަށް މައްސަލަ ހުށަހެޅީ ޖީތޭ އަށް ބޮޑުބޭބެ ކިޔާ އަންހެނެކެވެ.
އޭނާ ބުނެފައިވާ ގޮތުގައި އޭރު އުމުރުން 28 އަހަރުގެ ޖީތޭގެ ފަރާތުން ޖިންސީ ގޯނާއާ ކުރިމަތިލާން ޖެހުނު އިރު އުމުރަކީ 18 އަހަރެވެ. މި ހާދިސާ ހިނގީ އޭނާގެ ބައްޕަގެ ހުއްދަ ހޯދައިގެން ޖީތޭގެ ފިލްމެއްގެ ޝޫޓިން އަސް ގެންގޮސް، ޖީތޭ ހުންނަ ހޮޓަލްގެ ކޮޓަރި ތެރޭގައި ކަމަށް ބުނެފައިވެ އެވެ.
އޭނާ ބުނި ގޮތުގައި މި ހާދިސާގެ ސަބަބުން ފާއިތުވި މި ދިގު މާޒީގެ ތެރޭގައި އުޅެން ޖެހުނީ ނަފުސާނީ ބޮޑު ބިރުވެރި ކަމެއްގެ ތެރޭގަ އެވެ.
މިކަމާ ބެހޭ ގޮތުން ޖީތޭގެ ވަކީލުންގެ ފަރާތުން ނެރުނު ބަޔާނެއްގައި ވަނީ އެ ތުހުމަތުތައް ދޮގުކޮށްފަ އެވެ. އަދި ހަދަހަދައިގެން މީހުންގެ އަގު ވައްޓާލަން ދޮގު ވާހަކަތައް ދެއްކުމުގެ ހައްގެއް އެއްވެސް މީހަކަށް ނޯންނާނެ ކަމަށް ބުނެފައިވެ އެވެ.
ވަކީލުން އަދި ވަނީ މީޑިއާގައި އެފަދަ ދޮގު ވާހަކަތައް ދައްކާ މީހުންގެ ވާހަކަތައް ބޮޑުކޮށްލައިގެން ގެނެސް ނުދިނުމަށް ވެސް އެދިފަ އެވެ.