ކަލާޒްގެ މަޝްހޫރު ޓީވީ ސިލްސިލާ "ސަސުރާލް ސިމްރަން ކާ" ގައި ކުރިން ބަތަލާގެ ރޯލް ކުޅުނު ދިޕިކާ ކައްކަރް ވެސް ބޮލީވުޑްގެ ފިލްމަކަށް ސޮއިކޮށްފަ އެވެ.
ކަލާޒުން މިހާރު ދައްކާ ކޮމެޑީ ޝޯ "އެންޓަޓައިންމަންޓް ކީ ރާތު" އިން ވެސް ފެންނަ ބަތަލާ ސޮއި ކުރި ފުރަތަމަ ފިލްމަކީ "ބޯޑަރު" ގެ ޑައިރެކްޓަރު ޖޭޕީ ދައްތާ މިހާރު އުފައްދަމުން އަންނަ ފިލްމް "ޕަލްޓާން" އަށެވެ.
އެ ފިލްމަށް ސޮއި ކުރިކަން ދިޕިކާ، 31، ވަނީ އިސްޓަގަމްރާމްގައި ވެސް ފޭނުންނާ ހިއްސާކޮށްފަ އެވެ. އެކަމަކު އޭނާ ފެނިގެން ދާނީ ކޮން ކަހަލަ ރޯލަކުން ކަމެއް ނޭނގެ އެވެ.
"ޕަލްޓާން" އަކީ "ބޯޑަރު" އާ އެއްގޮތަށް ބޮޑު ކާސްޓެއް ހިމެނޭ ހަނގުރާމަތީ ފިލްމެކެވެ. މީގެ ކާސްޓުންގެ ތެރޭގައި އަރުޖުން ރާމްޕާލް، ޖެކީ ޝްރޮފް، ހާޝްވަރްދަން ރާނޭ، ސޯނޫ ސޫދް، ގުރްމީތު ޗައުދަރީ އަދި ރޯނިތު ރޯއި ފަދަ އެކްޓަރުން ހިމެނެ އެވެ.
ދާދި ފަހުން މީޑިއާތަކުން ރިޕޯޓްކޮށްފައިވާ ގޮތުގައި މި ފިލްމްގައި އަރުޖުންގެ އަންހެނުންގެ ރޯލަށް އީޝާ ގުޕްތާ ވެސް ވަނީ ސޮއިކޮށްފަ އެވެ.
ބޮލީވުޑަށް ނުކުންނަ ޓީވީ ތަރިން އިތުރުވެފައިވާ އިރު އަކްޝޭ ކުމާރްގެ "ގޯލްޑް" ގެ ބަތަލާއަކީ "ނާގިން" ފަދަ ސިލްސިލާތައް ކުޅެފައިވާ މޯނީ ރޯއި އެވެ. އަދި ރިތިކް ރޯޝަން މިހާރު ކުޅެމުން އަންނަ ފިލްމް "ސްޕަ 30" ގެ ބަތަލާއަކީ "ކުމްކުމް ބަގިޔާ" އިން ވިދާލި ބަތަލާ މުރްނާލް ތާކޫރް އެވެ.