ސ. ގަމާއި ފޭދޫ ގުޅޭ ކޯޒްވޭ މަތިން ބާރު ސްޕީޑްގައި ދުއްވާފައި ދިޔަ ކާރެއް ކޮންޓްރޯލް ނުކުރެވިގެން މޫދަށް ވެއްޓިއްޖެ އެވެ.
މައުލޫމާތު ލިބިފައިވާ ގޮތުގައި ފޭދޫން ގަމަށް ދުއްވާފައި ދިޔަ ކާރު ކޮންޓްރޯލް ނުކުރެވިގެން ގޮސް މޫދަށް ވެއްޓުނު އިރު އޭގައި ހުރީ ޑްރައިވަރު އެކަންޏެވެ.
މިއަދުގެ ވަރަށް ފަތިހުގެ ވަގުތެއްގައި ހިނގި ހާދިސާގައި އޭނާ އަށް އެއްވެސް އަނިޔާއެއް ލިބިފައެއް ނުވެއެވެ.
"ބާރު ސްޕީޑްގައި އައި ގޮތަށް އައިސް ކޮންޓްރޯލް ނުކުރެވި ކޯޒްވޭގެ ފުއްޓަރު ފަރާތަށް ވެއްޓުނީ. ވެއްޓުނު ގޮތަށް ކޯޒްވޭ ގައި އޮއި ދެމޭގޮތަށް އޮންނަ ދިމާލުން ކާރު އަނެއް ފަޅިއަށް (އިރުމަތީ ފަރާތަށް) ދިޔައީ. ކާރު އެއްކޮށް އަޑިއަށް ދިއުމުގެ ކުރިން ޑްރައިވަރު ކާރުން ފޭބި." މަންޒަރު ދުށް މީހަކު 'އައްޑޫލައިވް' އަށް ބުންޏެވެ.
މި ހާދިސާގައި ކާރު ދުއްވަން އިން މީހާ ސަލާމަތް ކޮށްފައި ވަނީ ފުލުހުންނާއި އާއްމު ރައްޔިތުންގެ މަސައްކަތުނެވެ.