(އެޕްރީލް 6، 2013 ވަނަ ދުވަހުގެ ބަޔާ ގުޅޭ)
"މަންމާ… އަޅުގަނޑު އައީ އެކަންޏެއް ނޫން ސާރާޔާ ވެސް އައި. ބޭރުގައި އެބަހުރި."
"އެހެންތަ؟ މަގޭ ސާރާ ކޮބާ؟ ހާލިދާ…އެ މަންޖެ މަގޭ ކައިރި އަށް ގެނެސްދީބަލަ."
"ސޫރަޖް ދަރިފުޅާ. ގޮސް ސާރާ ކޮއްކޮ ގޮވައިގެން އާދޭ." ހުއްދަ ލިބުނު ކަމެއް ނޭނގެއެވެ. ބަނޑިއެއް ލައްވާލާފައި ސޫރަޖް ދުއްވައިގަތެވެ. އަދި ސާރާގެ އަތުގައި ހިފާލައިގެން ހާލިދާމެން ކައިރި އަށް އަ އެވެ. އެ މީހުންނާ އެކު ޒައިނަބު އާއި މަރިޔަމްފުޅު ވެސް އެތެރެއަށް ވަނެވެ.
އެމަޖެންސީ ޑިޕާޓްމަންޓަކީ މާ ގިނަ މީހުންނަށް ވަދެ ނުތިބެވޭ ޑިޕާޓުމަންޓަކަށްވާތީ ކަންނޭނގެ އެވެ. ނަރުހުން ކޮންމެވެސް ވަރަކަށް އެ ދިމާލަށް ބަލާލި އެވެ. އެހެނަސް ވަގުތުގެ ނާޒުކު ކަމަށް ބަލާފައި ކަންނޭނގެ އެވެ. އެއްވެސް އެއްޗެކޭ އެ މީހުން ނުބުނެ އެވެ.
"މަގޭ ދަރިފުޅާ ސާރާ. މަންމަ ކައިރި އަށް އާދޭ. މަންމަ ގައިގާ ބައްދާލަ ދީ މަންމަ އާ ދުރަށް ނުދޭ. މަންމަ މޮޔަ ވެދާ." ހުސްނާ ރޮމުން ސާރާގެ ގައިގާ ބައްދަމުން ބޮސްދެމުން ދިޔަ އެވެ.
ހަލިދާ ވެސް ފެންކަޅިވެ ބަސް ހުއްޓިފައި ހުއްޓެވެ. އެވަގުތު ނަސީމު ވެސް އެމީހުން ކައިރި އަށް އައިސް ހާލިދާގެ ކޮނޑުގައި އަތް ބާވާލިއެވެ
"ހާލިދާ ހުސްނާ ގޮވައިގެން ކުޑަކުދިންގެ ވޯޑަށް ދޭ. އެ ސޮރު އަދިވެސް މުޅިއަކުން ހޭނާރާ. މަ މި ދަނީ އެ ސޮރުގެ ބޭސް ނަގަން." ނަސީމު ދިއުމުން ހާލިދާ ހުސްނާމެން ގޮވައިގެން ކުޑަކުދިންގެ ޕްރައިވެޓް ވޯޑަށް ދިޔަ އެވެ.
ހާލިދާ އަށް ވެސްމު ރާދު އޮތްގޮތް ފެނުމުން މޫނުގައި އަތް އެޅުމަށް ފަހު ބާރަކަށް ރޮއިގަނެވުނެވެ. މި އޮތްހާ އިރު ހިތްވަރު ކުރި ހާލިދާ އަށް ވެސް އެ ސޮރު ފެނުމުން ބަޑިފަޅައިގެން ދިޔައީ އެވެ. ހުސްނާ އަށްވީ އެހެން ގޮތެކެވެ. މުރާދުގެ ގައިމައްޗަށް ވެއްޓިގަ ނެވުނީ އެވެ.
"މަގޭ ދަރިފުޅާ… ލޯ ހުޅުވަބަލަ…އާދޭސް ކުރަން. އިރާދަކުރެއްވިއްޔާ ދަރިފުޅަށް އެއްވެސް ގޮތެއް ނުވާނެ."
"އާނ ހުސްނާ… އަހަރެމެންގެ ދަރިފުޅަށް އެއްވެސް ދެރަގޮތެއް ނުވާނެ." ކަރީމު ހުސްނާގެ ގައިގާ ހިފަހައްޓާލަމުން ބުނެލި އެވެ.
"ކަރީމް. މިވީ ކީއްތޯ؟ ކުށްވެރިޔަކީ އަޅުގަނޑު. އަޅުގަނޑަށް މާފުކުރޭ." ރޮމުން ގިސްލަމުން ކަރީމުގެ ގައިގައި އޮޅުލައިގެން ހުރެ ހުސްނާ ބުނަމުން ދިޔަ އެވެ.
"ހުސްނާ. ކެތްތެރިވޭ. ﷲ ވެސް ވޮޑިގެންވަނީ ކެތްތެރީންނާ އެކު." ކަރީމް ހުސްނާގެ ބޮލުގައި ފިރުމާލަމުން ނަސޭހަތްދީ ހިތް ވަރުދިނެވެ.
ފިރިމީހާގެ ލޯތްބާއި އަޅާލުމާއި އޯގާތެރި ބަސްތަކަކީ ވެސް ހިތާމަވެރި ވަގުތުތަކުގައި ކި ހާބޮޑު ފަރުވާއެއްކަން މިއަދު ހުސްނާ އަށް އިހުސާސް ވި އެވެ.
ކައިވެނީގެ ފަހުން ދިމާވި ކޮންމެ ހާދިސާއެއްގައި ކަރީމު ހުރީ ހުސްނާ އާ އެކުގަ އެވެ. ދުވަހަކު ވެސް ދެކޮޅު ހަދާފައި ދެރައެއް ނުކުރެ އެވެ. އަބަދުވެސް ހިތްވަރު ދިނެވެ. ފުރަތަމަ ހާދިސާ އެނަމާ ބޯޓް ފެތުމުގެ ހާދިސާގައި މަންމަމެން ނިޔާވި ވަގުތު ވެސް މި ފަދައިން ކަރީމު ހުސްނާ އާ އެކުގައި ވި އެވެ. އަދި ދަރިޔަކު ނެތި ހިތާމަ ކުރި އިރު އެތައް ހިތްވަރެއް ދިނެވެ. ދަރިން ދެއްވަނީ ﷲ ކަން ހަނދާންކޮށް ދިނެވެ.
(ނުނިމޭ)