ކުއްލި ނުރައްކަލުގެ ހާލަތު އިއުލާންކޮށް ރައީސް އަބްދުﷲ ޔާމީން ނެރުއްވި ޤަރާރުގެ ސައްޙަކަމާއި މެދު ޤާނޫނީ ބަހުސަކަށް ވަޑައިގަތުމަށް ދައުލަތުގެ ވަކީލުންނަށް މަޝްހޫރު ޤާނޫނީ ވަކީލު އަލްއުސްތާޛް މައުމޫން ހަމީދު ދައުވަތު ދެއްވައިފިއެވެ.
މައުމޫން ހަމީދު މިފަދަ ދައުވަތެއް ދައުލަތުގެ ވަކީލުންނަށް ފޮނުވާފައި ވާއިރު މީގެ ކުރިން އެބޭފުޅާ ވަނީ ކުއްލި ނުރައްކަލުގެ ހާލަތު އިއުލާންކޮށް ނެރުނު ޤަރާރުގައި ހުރި ބޮޑެތި ޤާނޫނި މައްސަލަތަކެއް ފާހަގަ ކުރައްވާފައެވެ.
އެގޮތުން ކުއްލި ނުރައްކަލުގެ ހާލަތު އިއުލާންކޮށް ނެރުނު ގަރާރުގައި ރައްޔިތުންގެ މަޖިލީހާއި ސުޕްރީމް ކޯޓުގެ ބައެއް ބާރުތައް ހަނިކޮށްފައި އޮތުމަކީ ގާނޫނާއަސާސީއާ ޚިލާފަށް ކަމަށް މައުމޫން ހަމީދު ވަނީ ވިދާޅުވެފައެވެ.
ދިވެހި ޖުމްހޫރިއްޔާގެ ޤާނޫނު އަސާސީގައި ބަޔާންކޮށްފައިވާ ގޮތުން ކުއްލި ނުރައްކަލުގެ ހާލަތުގައި ހިފެހެއްޓޭނީ ގާނޫނުއަސާސީގެ ދެވަނަ ބާބުގައި ބަޔާންކުރާ ހައްގުތައް އެކަންޏެވެ.
ޤާނޫނު އަސާސީގެ 254 ވަނަ މާއްދާގައި ކުއްލި ނުރައްކަލުގެ ހާލަތު އިއުލާންކުރުމަށްޓަކައި ނެރޭ ޤަރާރުގައި ކުއްލި ނުރައްކަލުގެ ހާލަތު އިއުލާންކުރަން ޖެހުނު ސަބަބާއި، އެ ނުރައްކަލާ ގުޅިގެން އަޅަންޖެހޭ އެންމެހައި ފިޔަވަޅުތައް ބަޔާންކުރަންވާނެ ކަމަށާއި، އޭގެ ތެރޭގައި ޤާނޫނު އަސާސީގެ 2 ވަނަ ބާބުގައި ކަނޑައެޅި ބަޔާންކޮށްފައިވާ ހައްގުތަކާއި މިނިވަނަކަމުގެ ތެރެއިން ބައެއް ހައްގު ހިފެހެއްޓި ދާނެ ކަމަށް ބުނެފައި ވެއެވެ.
އެހެން ނަމަވެސް ކުއްލި ނުރައްކަލުގެ ހާލަތު އިއުލާންކޮށް ނެރުނު ގަރާރުގެ ދަށުން އެބާބުގައި ނުހިމެނޭ ބައެއް މާއްދާތައް ވެސް ހިފަހައްޓާފައިވެއެވެ.
ކުއްލި ނުރައްކަލުގެ ހާލަތު އިއުލާންކޮށް ނެރުނު ޤަރާރާއި އަދި އެއަށް ފަހު ސަރުކާރުން ޤާނޫނާއި ޚިލާފަށް އަމަލުކުރަމުންދާ ކަންތަކުގެ ވާހަކަ މައުމޫން ހަމީދު ވާހަކަ ދައްކަވަމުން ގެންދަވާތީ ޕީޕީއެމްގެ އިސް ބޭފުޅުން ގެންދަވަނީ މައުމޫން ހަމީދަށް ވަރަށް ބޮޑަށް ފާޑުވިދާޅުވަމުންނެވެ.
އެގޮތުން މިއަދު ބޭއްވި ނޫސްވެރިންގެ ބައްދަލުވުމެއްގައި ޕީޕީއެމްގެ ނައިބު ލީޑަރު އަބްދުއްރަހީމް ވިދާޅުވެފައި ވަނީ. "ގާނޫނު އަސާސީއަކީ ހަމައެކަނި މައުމޫނު ހަމީދަށް އެނގިލައްވާ އެއްޗެއް ނޫން" ކަމަށެވެ.
އަދުރޭ މިހެން ވިދާޅުވެފައި ވަނިކޮށް ޤާނޫނީ ބަހުސަކަށް ވަޑައިގަތުމަށް ދައުލަތުގެ ވަކީލުންނަށް ފޮނުއްވި ދައުވަތު މައުމޫން ހަމީދު ވަނީ އަދުރޭ އަށް ކޮޕީ ކުރައްވާފައެވެ.
ޓްވިޓާ މެދުވެރިކޮށް ފޮނުއްވި ދައުވަތުގައި މައުމޫން ހަމީދު ވަނީ ކުއްލި ހާލަތު އިއުލާންކޮށް ނެރުނު ޤަރާރާއި ގުޅޭގޮތުން ބަހުސް ކުރެއްވުމަށް، ބޭނުން އަދަދަކަށް ވަކީލުން ގޮވައިގެން ވަޑައިގަތުމަށް އެދިވަޑައިގެންފައެވެ.