ސަލްމާން ހާނާއި ކަރީނާ ކަޕޫރު ލީޑް ރޯލް ކުޅުނު "މޭ އޯރް މިސިޒް ކަންނާ" އިން ޑައިރެކްޓަރުގެ ގޮނޑި އަށް ތައާރަފްވި ޕްރޭމް ރާޖް ކެންސަރަށް ފަރުވާ ހޯދަމުން އަންނަ ކަމަށް ރިޕޯޓްތައް ބުނެފި އެވެ.
ބޮލީވުޑްގެ ރިޕޯޓްތައް ބުނާ ގޮތުގައި މިދިޔަ މަހު ލަންޑަނަށް ގޮސް އޭނާ ވަނީ ކެންސަރުގެ ކާމިޔާބް ސާޖަރީއެއް ވެސް ހަދައިފަ އެވެ.
ފަރުވާ އަށް ފަހު ޕްރޭމް ނޫސްވެރިންގެ ގާތުގައި ބުނެފައި ވަނީ އޭނާގެ ސާޖަރީ ވަރަށް ކާމިޔާބް ކަމަށާއި ކެންސަަރުން މިހާރު ސަލާމަތްވެފައިވާ ކަމަށެވެ. އެކަމަކު އޭނާ ފަރުވާ ހޯދީ ކެންސަރުގެ ކޮން ބާވަތެއް ކަމަށް ޒުވާން ޑައިރެކްޓަރު ނުބުނެ އެވެ.
ޕްރޭމް އެންމެ ފަހުން ޑައިރެކްޓް ކުރި "އިޝްގް އިން ޕެރިސް" ރިލީޒް ނުވެ، ދިގުލައިގެންދާތީ އެކަމާ ބެހޭ ގޮތުން ސުވާލު ކުރުމުން ފިލްމްގެ ބަތަލާ އަދި ޕްރޮޑިއުސަރު ޕްރިތީ ޒިންތާ ބުނީ ފިލްމް ސްކްރީން ނުކުރެވި ލަސްވަނީ ޕްރޭމް ބަލިވެ އުޅޭތީ ކަމަށެވެ. އެހެން ނަމަވެސް އިތުރު އެއްވެސް ތަފުސީލެއް ޕްރިތީ ނުދެ އެވެ.
ޕްރޭމް ބުނީ އޭނާގެ އާ ފިލްމް "އިޝްގް އިން ޕެރިސް" އަންނަ މަހު ފަހުކޮޅު ރިލީޒް ވާނެ ކަމަށެވެ. މިއީ ގިނަ ދުވަސްތަކެއްގެ މެދުކެނޑުމަކަށް ފަހު ޕްރިތީ ސްކްރީނަށް އަންނަ ފިލްމް ވެސް މެ އެވެ.
ޕްރޭމް އާއި ޕްރިތީ ޒިންތާ އެ މީހުންގެ އާ ފިލްމް "އިޝްގް އިން ޕެރިސް" ގެ ޕްރޮމޯޝަނަލް އިވެންޓެއް ގައި.