ފުލުހުންގެ މުއައްސަސާއިން މިއަދު އިނގިރޭސި ބަހުން ނެރުނު ނޫސްބަޔާނުގައި ރާއްޖޭގައި ނެތް ޤާނޫނެއްގެ ވާހަކަ ލިޔެފައިވާ މައްސަލަ ފެންމަތިވެއްޖެއެވެ.
އިނގިރޭސި ބަހުން ފުލުހުން ނެރުނު ނޫސް ބަޔާނުގައި "ފްރީޑަމް އޮފް އެސޯސިއޭޝަން" ޤާނޫނެއްގެ ވާހަކަ ވަނީ ލިޔެފައެވެ. އެ ބަޔާނުގައި ބުނެފައިވާގޮތުގައި މާލޭގައި ކުރަމުން ގެންދާ މުޒާހަރާތައް ސުލްހަވެރި ނޫން ކަމަށާއި "ފްރީޑަމް އޮފް އެސޯސިއޭޝަން ޤާނޫނާއި" ޚިލާފަށް އަމަލުކުރުމުގެ ފުރުސަތު ފުލުހުން ނުދޭނެއެވެ.
Press Statement:PMC/2018/10 (EV) pic.twitter.com/Dcx8P6Mxss
— Maldives Police (@PoliceMv) February 17, 2018
ރާއްޖޭގައި އެފަދަ ޤާނޫނަކަށް އަމަލުކުރަމުން ނުދާއިރު ބެލެވޭ ގޮތުގައި ފުލުހުންގެ ނޫސް ބަޔާނުގައި ގެންނަން އުޅެފައި ވަނީ "ފްރީޑަމް އޮފް އެސެމްބްލީ"، އެއްވެ އުޅުމުގެ މިނިވަން ކަމުގެ ޤާނޫނުގެ ވާހަކައެވެ.
ފުލުހުންގެ ނޫސް ބަޔާނުގައި ރާއްޖޭގައި ނެތް ޤާނޫނެއްގެ ވާހަކަ ލިޔެފައިވާތީ އެކަމާއި ބެހޭގޮތުން ފުލުހުންގެ ބަހެއް ހޯދުމަށް ކުރި މަސައްކަތް އަދި ވަނީ ކާމިޔާބު ނުވެފައެވެ.