އައްޑޫ ސިޓީގައި އިދިކޮޅު ފަރާތްތަކުގެ ހަރަކާތްތައް މަޑުޖެހިފައި އޮތުމަށް ފަހު ފެބްރުއަރީ މަހުގެ 16 ވަނަ ދުވަހު ވެހިކަލް ބުރެއް ބޭއްވުމަށް އުޅުމުން ފުލުހުން ނިކުމެ ވަނީ އެ ވެހިކަލް ބުރު ހުއްޓުވާފައެވެ.
ލިންކް ރޯޑުގެ އެކި ހިސާބުތައް ބަންދުކޮށް ފޭދޫ، މަރަދޫ އަދި މަރަދޫފޭދޫ އިން ވެހިކަލް ބުރުގައި ބައިވެރިވުމަށް ހިތަދޫއަށް ދިއުން ހުއްޓުވުމުން މަރަދޫ، ފޭދޫ އަދި ހިތަދޫގައި ރައްޔިތުން ވަނީ އިހްތިޖާޖްކޮށްފައެވެ.
އެ އިހްތިޖާޖް ހުއްޓުވުމަށް ރަޔަޓް ގިޔަރުގައި ފުލުހުން ނިކުމެ އާއްމު ރައްޔިތުން ފަހަތަށް ޖެއްސި ފަހުން އައްޑޫ އެމްޑީޕީ ގޮފިން ވަނީ ސިލްސިލާ ގޮތެއްގައި އިހްތިޖާޖް ކުރާނެ ކަން އިއުލާން ކޮށްފައެވެ.
ސުޕްރީމް ކޯޓުން ފެބްރުއަރީ މަހުގެ 1 ވަނަ ދުވަހު ނެރުނު އަމުރު ތަންފީޒު ކުރުމަށް ގޮވާލައި އައްޑޫގައި އިހްތިޖާޖް ކުރަން ފެށިފަހުން ދުވަހެއް ދުވަހަކަށް އެ އިހްތިޖާޖުތަކުގައި ބައިވެރިވާ މީހުންގެ އަދަދު އިތުރުވަމުންނެވެ.
އެގޮތުން މިއަދު ހަވީރު ފަސްޓް ލޭޑީ ފާތިމަތު އިބްރާހިމް އައްޑޫއަށް ވަޑައިގެންނެވި ވަގުތާއި ދިމާކޮށް ހިތަދޫގައި ގިނަ ބަޔަކު ނިކުމެ ސަރުކާރާއި ދެކޮޅަށް އަޑު އުފުލާފައެވެ. އަދި އެމީހުންގެ އަދަދު ގިނަ ވުމުގެ ސަބަބުން އެ ސަރަހައްދަށް ދިޔަ ފުލުހުންނަށް ވެސް އެއްވުމުގެ ބައިވެރިން ކޮންޓްރޯލް ކުރެވިފައި ނުވާކަން ފާހަގަކޮށްލެވެއެވެ.