މަޝްހޫރު ވާހަކަ ލިޔުންތެރިޔާ ބިންމާ އިބްރާހީމް ވަހީދުގެ ވާހަކަ "ޖިނާ؛ ފަތިސްހަނދުވަރުގެ ފެށުން" އަށް ބިނާކޮށް އުފައްދައި މިހާރު އޮލިމްޕަހުގައި 3ޑީކޮށް ދައްކަމުން އަންނަ "ފަތިސްހަނދުވަރުގެ ފެށުން" އަށް އޭނާ ފާޑު ކިޔައިފި އެވެ.
އެ ފިލްމްގެ ޕްރީމިއާ ޝޯ އަށް ފަހު ބިންމާގެ އެފްބީ ޕޭޖްގައި އޭނާ ބުނެފައި ވަނީ "ފަތިސްހަނދުވަރުގެ ފެށުން" ބަލަން ދިޔައީ ފިލްމާ ދޭތެރޭ ވަރަށް ބޮޑަށް ހިތްހަމަޖެހޭނެ ކަމުގެ އުންމީދާ އެކު ކަމަށެވެ.
"އެކަމަކު އެއީ އަހަރެން ލިއުނު ވާހަަކަ އިން ތަންތަންކޮޅު ނަގައިގެން ބަޔަކު ހަދާފައި އޮތް އެއްޗެއް. އޭގައި ވާ ގޮތް މަށަށް ވެސް ނޭނގުނު" ކަމަށް ބިންމާ ބުނެފައިވެ އެވެ. އަދި "ލިޔުންތެރިންގެ ހައްގުތައް ހިމާޔަތް ކުރެވޭނެ ދުވަހެއް އަންނަންދެން އެކަން އޮންނާނީ އެހެން ކަމަށް" ބިންމާގެ އެފްބީ ސްޓޭޓަސްގައި އޭނާ ލިޔެފައިވެ އެވެ.
ރާއްޖޭގައި ހުރި އެންމެ މޮޅު ވާހަކަ ލިޔުންތެރިޔާގެ ގޮތުގައި ގިނަ ބަޔަކު ގަބޫލް ކުރާ އަދި "ފަތިސްހަނދުވަރުގެ ފެށުން" 30،000ރ. އަށް ވިއްކާލި ލިއުންތެރިޔާ އިތުރަށް ބުނެފައި ވަނީ "ފަތިސްހަނދުވަރުގެ ފެށުން" ގައި ބަލަން އޮތް ހަމައެކަނި އެއްޗަކީ ފިލްމްގެ 3ޑީ މަސައްކަތް ކަމަށެވެ. އަދި ފިލްމްގެ ކުލަ ވަރަށް ހިތްގައިމު ކަމަށް ބިންމާ ބުނެފައިވެ އެވެ.
"ގަނޑުފެން"، "ދައުވަތު" އަދި "ލޯބީގެ ހަދިޔާ" އަދި "ޝާހްބާޒް" ފަދަ މޮޅެތި ވާހަކަތައް ލިޔެފައިވާ ބިންމާ އިތުރަށް ބުނެފައި ވަނީ މީގެ 17 އަހަރު ކުރިން ސްލޭމް ސްޓޫޑިއޯ އިން ޕްރޮޑިއުސްކޮށް އީސާ ޝަރީފް ޑައިރެކްޓް ކުރި "ފަތިސްހަނދުވަރު" މާ ފުރިހަމަ ކަމަށެވެ. އަދި އެ ފިލްމް ގެނެސް ދީފައި ވަނީ "ހަވީރު" ނޫހުގައި ޝާއިއު ކުރި ވާހަކަ އާ އެއްވެސް ތަފާތެއް ނެތި އޭގައި އޮތް ގޮތަށް ކަމަށް ބިންމާ ބުންޏެވެ.
"ފަތިސްހަނދުވަރުގެ ފެށުން" ބިނާކޮށްފައި ވަނީ 2009 ވަނަ އަހަރު ބިންމާ "ހަވީރު" ގައި ގެނެސް ދިން "ޖިނާ؛ ފަތިސްހަނދުވަރުގެ ފެށުން" ގެ މައްޗަށެވެ.
މިއީ ކުރީ ފިލްމްގެ ކުރިން ހިނގާފައިވާ ހާދިސާތަކެއް ކިޔައިދޭ ފިލްމެކެވެ. އެ ދެ ވާހަކައަކީ ވެސް ކިޔުންތެރިންގެ ވަރަށް ބޮޑު ތަރުހީބެއް ލިބިފައިވާ ދެ ވާހަކަ އެވެ.
ފިލްމާ ބެހޭ ގޮތުން ލިޔުންތެރިޔާ ފާޑުކިޔާފައިވާ އިރު "ފަތިސްހަނދުވަރުގެ ފެށުން" ގައި މުހިއްމު ރޯލެއް އަދާކޮށްފައިވާ މުހައްމަދު ފައިސަލް ވީޓީވީގެ "ސިނަމާ" ޕްރޮގްރާމްގައި ހޮނިހިރު ދުވަހުގެ ރޭ ވާހަކަ ދައްކަމުން ބުނީ ފިލްމް ހަދާފައި ވަނީ ސްކްރީން ޕްލޭ އަށް ގެންނަން ޖެހޭ ބަދަލުތަކެއް ގެނެސްގެން ކަމަށެވެ.
"ފަތިސްހަނދުވަރުގެ ފެށުން" އަކީ ރާއްޖޭގެ ފުރަތަމަ 3ޑީ ފިލްމެވެ. "ފަތިސްހަނދުވަރު" އަކީ ރާއްޖޭގައި ފުރަތަމަ ފަހަރަށް ސްޕެޝަލް އިފެކްޓްސް ހިމަނައިގެން ގެނެސް ދިން އެންމެ ކާމިޔާބް ބިރުވެރި ފިލްމެވެ. އެ ފިލްމް ރިލީޒް ކުރީ 1997 ގަ އެވެ.
ބިންމާގެ ވާހަކަަތަކަށް ހަދާފައިވާ ފާހަގަކޮށްލެވޭ އިތުރު ފިލްމްތަކުގެ ތެރޭގައި "ހައްގު"، "ވެހޭ ވާރޭތެރެއިން"، "14 ވިލޭރޭ"، "ހިތްހެޔޮ ކުރާތި"، "ޖިންނި"، "ލަވް ސްޓޯރީ" ފަދަ ފިލްމްތައް ހިމެނެ އެވެ.