ރާއްޖޭގެ މިހާރުގެ ރައީސަކީ "އިކޮނޮމިސްޓޭކެއް" ކަމަށް ލަކްސް ހޮޓެލްސް އެންޑް ރިސޯޓްސްގެ ރީޖަނަލް ޑައިރެކްޓަރ ފޯރ ޓްރެއިނިންގ ޑިވެލޮޕްމަންޓް އެންޑް ކޮލިޓީ އެޝުއަރެންސް ޙުސެއިން އަފީފް ވިދާޅުވެއްޖެއެވެ.
ދުނިޔޭގެ ނުފޫޒު ގަދަ 100 ހިއުމަން ރިސޯސް (އެޗްއާރް) ޕްރޮފެޝަލުންގެ ތެރޭގައި ހިމެނި އެ ދާއިރާ އިން ދޭ އެވޯޑް ވެސް ހާސިލް ކުރައްވާފައިވާ ސ.ހިތަދޫ އަށް ނިސްބަތްވެވަޑައިގަންނަވާ އަފީފް މިހެން ވިދާޅުވެފައި ވަނީ މިއަދު ފޭސްބުކްގައި ކުރެއްވި ޕޯސްޓެއްގައެވެ.
އަފީފް އޭނާގެ ފޭސްބުކްގައި ކުރެއްވި ޕޯސްޓުގައި ވަނީ ކުއްލި ނުރައްކަލުގެ ހާލަތުގެ މުއްދަތު އިތުރުކުރަން ސަރުކާރުން ނިންމުމާއި ގުޅިގެން އެކަމާއި ނުރުހުން ފާޅުކުރައްވާފައެވެ.
އަފީފް ވިދާޅުވި ގޮތުގައި "އިކޮނޮމިސްޓޭކް"ގެ މި އަމަލަށް ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަފުން މައާފު ނުކުރާނެ ކަމަށާއި އަދި ހަނދާން ވެސް ނައްތައި ނުލާނެ ކަމަށެވެ.
އަފީފްގެ އިތުރުން ވެސް ފަތުރުވެރިކަމުގެ ދާއިރާގައި މަސައްކަތް ކުރާ ގިނަ ފަރާތްތަކުން ދަނީ، ކުއްލި ނުރައްކަލުގެ ހާލަތު އުވާލުމަށް ގޮވާލަމުންނެވެ.