ޕީޕީއެމްގެ ފަރާތުން އިއްޔެ އައްޑޫގައި ބޭއްވި ހަރަކާތުގެ ފޮޓޯތައް ކެމެރާ ހަރުކޮށްގެން ފޮޓޯ ނެގުމަށް ބޭނުންކުރާ ޑްރޯންއެއް، ބޭނުންކޮށްގެން ނެގުމުން ހައުސިން މިނިސްޓްރީގެ ކޯޑިނޭޓަރު ކަމުން ދާދި ފަހުން އިސްތިއުފާ ދިން ހަސަން ނާޒިލަށް ޕީޕީއެމްގެ އެކްޓިވިސްޓުންގެ ނުރުހުން އަމާޒުވެއްޖެއެވެ.
ސޯޝަލް މީޑިޔާގައި ނާޒިލް ޑްރޯން އޮޕަރޭޓް ކުރާ ފޮޓޯއަކާއި އެކު ޕީޕީއެމްގެ ބައެއް މެންބަރުން ގެންދަނީ ނާޒިލަކީ "ފިތުނަ އުފައްދަން" މަސައްކަތް ކުރާ މީހެއް ކަމަށް ސިފަކޮށްފައެވެ.
ޑްރޯން މެދުވެރިކޮށް ނަގާފައިވާ ފޮޓޯއެއް ސޯޝަލް މީޑިޔާގައި އާންމުވެފައިވާއިރު އެއީ ނާޒިލް ނެގި ފޮޓޯއެއް ކަމެއް ނުވަތަ އެހެން ފަރާތަކުން ނެގި ފޮޓޯއެއް ކަމެއް ސާފެއް ނުވެއެވެ.
މިކަމާއި ގުޅިގެން 'އައްޑޫލައިވް' އަށް މައުލޫމާތު ދެމުން ނާޒިލް ބުނީ ޑްރޯން އިން ނެގި ކަމަށް ބުނާ ފޮޓޯއެއް އޭނާ ނުދެކޭ ކަމަށެވެ. އަދި އެއްވެސް ފަރާތަކުން އޭނާއަށް ގުޅައި ނުރުހުން ފާޅުކޮށްފައި ނުވާ ކަމަށެވެ.
ޑްރޯން އިން ނެގި ފޮޓޯއިން ޕީޕީއެމްގެ ހަރަކާތުގައި ބައިވެރިވި މީހުންގެ އަދަދު މަދުކަން ހާމަވާ ކަމަށް ގިނަ ބަޔަކު ވަނީ ބުނެފައެވެ. އެހެން ނަމަވެސް އެ ފާޑުކިޔުންތަކަށް ރައްދު ދެމުން ޕީޕީއެމްގެ އެކްޓިވިސްޓުން ބުނެފައިވަނީ އެ ފޮޓޯ އަކީ ހަރަކާތް ފެށުމުގެ މާ ކުރިން ނަގާފައިވާ ފޮޓޯއެއް ކަމަށެވެ.