އައްޑޫ ސިޓީގައި އިދިކޮޅު ފަރާތްތަކުން ހިންގާ ސިޔާސީ ހަރަކާތްތަކަށް ހިތްވަރު ލިބޭ ގޮތަށް ފުލުހުން އަމަލުކުރަމުން ގެންދާ ކަމުގެ ތުހުމަތު ފުލުހުންނަށް އަމާޒުވެއްޖެއެވެ.
'އައްޑޫލައިވް' އާއި ވާހަކަ ދެއްކި ޕީޕީއެމްގެ އިސް އެކްޓިވިސްޓުން ބުނާގޮތުގައި އައްޑޫގައި އިދިކޮޅު ފަރާތްތައް "ޗާޖުކުރަނީ" ފުލުހުން ކަމަށެވެ. އަދި ފުލުހުން އެމީހުންނަށް ހުރަސް އަޅަން ފެށުމުން "އެންމެ 150 އެއްހާ މީހުން އެއްވަމުން ދިޔަ ހަރަކާތަށް ސަމާލުކަން ލިބޭ" ކަމަށް އެމީހުން ތުހުމަތު ކުރެއެވެ.
"މެޑަމްގެ އިވެންޓަށް މުޅި އައްޑޫ ހާޒިރުވެފައި އޮތްވައި އިދިކޮޅަށް މަދު ބަޔަކު އެއްވީ. ފުލުހުން ނިކުމެ ހުރަސް އެޅުމުން އެމީހުންނަށް ހިތްވަރު ލިބިގެން ކިކު އައިސްގެން ހެދީ. ފުލުހުން ނުޖެހޭ 150 މީހުން ފަހައި ދުވާކަށް. އެމީހުން ވައި ވެގެން ހުއްޓާލާނެ." ޕީޕީއެމްގެ އެކްޓިވިސްޓަކު ބުންޏެވެ.
ހޮނިހިރު ދުވަހު އިދިކޮޅު ފަރާތްތަކުން ބޭއްވި އެއްވުމާއި ބެހޭގޮތުން ވާހަކަ ދެއްކި އެހެން އެކްޓިވިސްޓަކު ބުނީ. "ވިއްސަކަށް މީހުން ފަހައި ފުލުހުން ދުވަން ހަދައިގެން، އެމީހުން ބޭނުންވި ފޮޓޯތައް ވެސް ލިބިއްޖެ" ކަމަށެވެ.
ޕީޕީއެމްގެ ބައެއް އެކްޓިވިސްޓުން މިގޮތަށް ބުނެފައިވާއިރު، އިދިކޮޅު ފަރާތްތަކުގެ އެއްވުންތަކަށް ފުލުހުން ހުރަސް އަޅަން ފެށިފަހުން އައްޑޫގައި އިދިކޮޅު ފަރާތްތަކުގެ އެއްވުންތަކަށް ދާ މީހުންގެ އަދަދު އިތުރުވަމުން އަންނަކަން ފާހަގަކުރެވެއެވެ.