ފެބްރުއަރީ މަހުގެ 1 ވަނަ ދުވަހު ސުޕްރީމް ކޯޓުގެ 5 ފަނޑިޔާރުން ނެރުނު ހުކުމް ތަންފީޒު ކުރުމަށް ގޮވާލައި އިދިކޮޅު ފަރާތްތަކުން ރޭ ވެސް އައްޑޫގައި އިހްތިޖާޖްކޮށްފިއެވެ.
"ކުއްލި ވެހިކަލް ބުރު"ގެ ނަމުގައި ހިތަދޫގައި ބޭއްވި މި ވެހިކަލް ބުރުގައި އައްޑޫގެ ގުޅިފައިވާ އަވަށްތަކުގެ ގިނަ ބަޔަކު ވަނީ ބައިވެރިވެފައެވެ. މިވެހިކަލް ބުރު ކުރިއަށް ގެންދިޔަ ވަގުތު ފުލުހުން ވަނީ ލިންކް ރޯޑުގެ އެކި ހިސާބުތައް ބަންދުކޮށްފަައެވެ.
އެހެންވެ ވެހިކަލް ބުރު ކުރިއަށް ގެންގޮސްފައި ވަނީ ހިތަދޫގެ މަގުތަކުގައެވެ.
ވެހިކަލް ބުރުގެ ބައިވެރިން ގޮވާލާފައި ވަނީ ރައީސް ޔާމީން އާއި ސަރުކާރުގެ ވެރިން އިސްތިއުފާ ދިނުމަށާއި ސުޕްރީމް ކޯޓުން ފެބްރުއަރީ މަހުގެ 1 ވަނަ ދުވަހު ނެރުނު ހުކުމް ތަންފީޒް ކުރުމަށެވެ.
ރޭގެ ވެހިކަލް ބުރު އެމްޑީޕީ ހަރުގެ ސަރަހައްދަށް ނިންމާލުމަށް ފަހު ވެހިކަލް ބުރުގެ ބައިވެިރންނާއި މުޚާތަބުކޮށް ހިތަދޫ ދެކުނު ދާއިރާގެ ކައުންސިލަރ ޔަސްރިފް އާއި އެމްޑީޕީގެ ހިތަދޫ މެދު ދާއިރާގެ ރައީސް މޫސަ އަދި އިމާދް ސޯލިހް ވަނީ ވާހަކަ ދައްކަވާފައެވެ.