މިއީ ދިވެހިރާއްޖޭގެ ސިޔާސީ މަސްރަޚުގައި ހަރަކާތްތެރިވާ ބޭފުޅުންނާއި ދައުލަތުގެ ބައެއް މުއައްސަސާތަކުން ތަކުރާރުކޮށް ދައްކަމުން ގެންދަނީ ސަލާމަތީ ބާރުތަކެއްގެ ވާހަކައެވެ. އިޝާރާތް ކުރަނީ ފުލުހުންނާއި ސިފައިންނަށެވެ.
ސިފައިންނާއި ފުލުހުންނަކީ "ސަލާމަތީ ބާރުތަކެއް" ގޮތުގައި ބުނަމުން ދިޔަ ނަމަވެސް ހަގީގަތުގައި ދިވެހި ޖުމްހޫރިއްޔާގެ ގާނޫނު އަސާސީގައި އެފަދަ ބާރުތަކެއްގެ ވާހަކައެއް ނެތެވެ. ފުލުހުން ބާއްވާ ޕްރެސް ކޮންފަރެންސް ތަކުގައި ވެސް ސަލާމަތީ ބާރުތަކުގެ ވާހަކަ ދެއްކިޔަސް އެ ފަދަ ބާރެއް ރާއްޖެއަކު ނެތެވެ.
ދިވެހި ޖުމްހޫރިއްޔާގެ ޤާނޫނު އަސާސީގެ 9 ވަނަ ބާބުގައި ބަޔާންކޮށްފައި ވަނީ "ސަލާމަތީ ޚިދުމަތް" ތަކުގެ ވާހަކައެވެ. ސަލާމަތީ ބާރުތަކެއްގެ ވާހަކައެއް ނޫނެވެ.
ޤާނޫނު އަސާސީގެ 243 ވަނަ މާއްދާގައި ސިފައިންގެ ޚިދުމަތް ބަޔާންކޮށްފައި ވާއިރު، ސިފައިންގެ ޚިދުމަތުގެ މައިގަނޑު މަޤްސަދަކީ، ދިވެހިރާއްޖޭގެ ޖުމްހޫރިއްޔާއާއި، ދިވެހިރާއްޖޭގެ ސަރަހައްދާއި، ދިވެހިރާއްޖޭގެ ހާއްސަ އިގްތިސާދީ ސަރަހައްދާއި، ރައްޔިތުން ރައްކާތެރިކޮށް ހިމާޔަތްކުރުމެވެ.
ފުލުހުންގެ ޚިދުމަތް ޤާނޫނު އަސާސީގެ 244 ވަނަ މާއްދާގައި ބަޔާންކޮށްފައި ވާއިރު، މައިގަނޑު މަގްސަދުތަކުގެ ތެރޭގައި ހިމެނެނީ މުޖްތަމައުގެ އަމާންކަމާއި ރައްކާތެރިކަން ދެމެހެއްޓުމާއި ދިވެހިރާއްޖޭގައި އުޅޭ އެންމެހައި މީހުން ހިމާޔަތްކޮށްދީ އެބައިމީހުންގެ މުދަލާއި ގެދޮރު ރައްކާތެރިކޮށްދިނުން، ޖިނާއީ ކުށްތައް ތަހުގީގުކުރުމާއި ހެކިތައް ރައްކާތެރިކޮށް ބެލެހެއްޓުމާއި، މައްސަލަތައް ޝަރީއަތަށް ހުށަހެޅުމާސް ބޭނުންވާނޭ ތައްޔާރީތައް ކުރުމާއި ޤާނޫނު ނެގެހެއްޓުމެވެ.