މިދިޔަ ހޮނިހިރު ދުވަހުގެ ރޭ ދުބާއީގައި މަރުވި ބޮލީވުޑްގެ މަޝްހޫރު ބަތަލާ ސްރީދޭވީގެ ޖަނާޒާ މިއަދު މެންދުރު ފަހު މުމްބާއީގައި ބާއްވަން ނިންމައިފި އެވެ.
އޭނާގެ ހަށިގަނޑު އޮޓޮޕްސީ ހަދައި މަރާ ބެހޭ އިތުރު ކަންކަން ބެލުމަށް ފަހު، ސްރީދޭވީގެ ހަށިގަނޑު އިންޑިއާ އަށް ގެނެވުނީ ރޭގެ ވަގުތެއްގަ އެވެ.
ކެރިއަރުގައި އިންޑިއާގެ އެކި ބަހުރުވަތަކުން 200 އަށް ވުރެ ގިނަ ފިލްމް ކުޅެފައިވާ ބަތަލާގެ މޫނު ދެއްކުން މިއަދު ހެނދުނުން ފެށިގެން މުމްބާއީގެ ސެލެބްރޭޝަން ސްޕޯޓްސް ކުލަބްގައި ދަނީ ކުރިއަށެވެ. ސްރީދޭވީގެ މޫނު ދެކިލަން އިންޑިއާގެ މުޅި ފިލްމް އިންޑަސްޓްރީހެން ޒިޔާރަތްކޮށް، އާއިލާ އަށް ހަމްދަރުދީ ކިޔާފައިވެ އެވެ.
އޭނާގެ ޖަނާޒާ ކުރިއަށް ދާނީ މެންދުރު ފަހު 3:30 ގައި ހިންދޫ ސިމިޓްރީގަ އެވެ.
ސްރީދޭވީ، 54، ކުއްލި މަރާ އެކު އެތައް ބަޔަކު ޝޮކްގައި ތިބި އިރު، އޭނާ މަރުވި ކަމަށް ފުރަތަމަ ރިޕޯޓްކޮށްފައި ވަނީ ހާޓްއެޓޭކެއް ޖެހިގެންނެވެ. އެކަމަކު ފަހުން ޕްރިވެންޝަން މެޑިކަލް ދުބާއީ ހޮސްޕިޓަލުން ހެދި އޮޕްޓްސީގައި ބުނީ ސްރީދޭވީ މަރުވީ ގެނބިގެން ކަމަށެވެ.
ރިޕޯޓްތައް ބުނާ ގޮތުން އޭނާ މަރުވީ ހޮޓެލްގެ ފާހާނާ ތެރޭގައި މަސްތުވެގެން ހުއްޓައި، ފެން އަޅާފައި ހުރި ބިލިގާތެރެއަށް ވެއްޓި ގެނބިގެންނެވެ.
ސްރީދޭވީ މަރުވި އިރު، ފިރިމީހާ އާއި ދެ ދެ ކުދިން ދުނިޔޭގައި އެބަ ތިއްބެވެ.