ދޫނިދޫ ޖަލު މިހާރު ވަނީ ފުރިފައި ކަމަށާއި އެތަނުގައި ތިބޭ ބައެއް މީހުންނަށް އެންމެ އެކަށޭނަ އަސާސީ ޙައްޤުތައް ފޯރުކޮށް ދެމުން ނުދާ ކަމަށް ގުޅިފައިވާ ސިޔާސީ ޕާޓީތަކުން ބުނެފިއެވެ.
ޖުމްހޫރީ ޕާޓީގެ މައި ޖަގަހަ މ.ކުނޫޒްގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވި ގޮތުގައި އެބޭފުޅާ ފުލުހުންގެ ބަންދަށް ގެންދިއުމުން ގިނަ ކަންތަކެއް އަމިއްލަފުޅަށް ކަންކަން ތަޖުރިބާ ކުރެވި ވަރަށް ގިނަ މައުލޫމާތުތައް އެނގި ސާފުވެފައިވާ ކަމަށެވެ.
ދޫނިދޫ ޖަލު ފުރިފައިވާ ކަމަށް ވިދާޅުވި ނަމަވެސް އެ ޖަލުގައި މިވަގުތު ބަންދުކޮށްފައި ތިބީ ކިތައް މީހުންނެއް ކަމެއް އަމީތު ވިދާޅެއް ނުވެއެވެ.
" އެތައް ޙައްޤެއް ވަނީ ނިގުޅައިގެންފައި. އަދަދު ނުދެންނެވި ކަމުގައި ވިއަސް ދޫނިދޫ ވަނީ ފުރިފައި. ދޫނިދޫގައި ބަންދުކޮށްފައި ބެހެއްޓުމަށް މާގިނަ ޖާގައެއް ނެތް،" އަމީތު ވިދާޅުވިއެވެ.
މީގެ އިތުރުން އަމީތު ވިދާޅުވީ، ދޫނިދޫ ޖަލުގައި ތިބި މީހުންނާއި ވާހަކަ ދައްކާލުމުން އެމީހުންނަށް ސާފު ބޯފެން ވެސް ނުލިބޭ ކަން ވެސް އެނގިވަޑައިގެންފައިވާ ކަމަށެވެ.