ފެބްރުއަރީ މަހުގެ 23 ވަނަ ދުވަހު އައްޑޫގައި އިދިކޮޅު ފަރާތްތަކުން ކުރި މުޒާހަރާގެ ބައިވެރިން ފަހަތަށް ޖެއްސުމަށްޓަކައި ގަޔަށް އަތްލަން ޖެހިއްޖެނަމަ ގަޔަށް އަތްލައިގެން ވިޔަސް ފަހަތަށް ޖެއްސުމަށް ފުލުހުންނަށް އެންގިކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ބުނެފި އެވެ.
އެޗްއާރްސީއެމް އިން މިހެން ބުނެފައިވަނީ ފެބްރުއަރީ މަހުގެ 23 ވަނަ ދުވަހު އައްޑޫގައި އިދިކޮޅު ފަރާތްތަކުން ކުރި މުޒާހަރާ ހިނގި ސަރަހައްދަށް ގޮސް އެކޮމިޝަނުގެ މުވައްޒަފުން ތައްޔާރު ކުރި ރިޕޯޓުގައެވެ.
"އައްޑޫ ސިޓީ ފުލުހުންގެ ކޮމާންޑަރު، މުޒާހަރާގެ ބައިވެރިން ފަހަތަށް ޖެއްސުމަށް ގޮވާލިކަން އަދި ގަޔަށް އަތްލަން ޖެހިއްޖެނަމަ ގަޔަށް އަތްލައިގެން ވިޔަސް ފަހަތަށް ޖެއްސުމަށް ފުލުހުންނަށް އެންގިކަން." އެޗްއާރްސީއެމްގެ ރިޕޯޓްގައި ބުނެފައި ވެއެވެ.
އެ ރިޕޯޓުގައި ބުނެފައިވާ ގޮތުގައި މުޒާހަރާގެ އެއްވެސް ބައިވެރިޔަކަށް އަނިޔާވި ތަނެއް އަދި ސިއްހީ ފަރުވާ ދިން މަންޒަރެއް ވެސް އެޗްއާރްސީއެމްގެ މުވައްޒަފުންނަށް ފެނިފައެއް ނުވެއެވެ.