ފެބްރުއަރީ މަހުގެ 23 ވަނަ ދުވަހު އައްޑޫގައި އިދިކޮޅު ފަރާތްތަކުން ބޭއްވި މުޒާހަރާގެ ބައިވެރިން ފުލުހުންނަށް އަޚްލާޤީ ގޮތުން ދަށު ދަރަޖައިގެ ބަސްތައް ރައްދުކުރި ކަމަށް އެޗްއާރްސީއެމް އިން ބުނެފިއެވެ.
އައްޑޫ މުޒާހަރާ ކަވަރުކުރުމަށް ދިޔަ އެޗްއާރްސީއެމްގެ ރިޕޯޓުގައި ބުނެފައިވާ ގޮތުގައި، މުޒާހަރާގެ ބައިވެރިން ފުލުހުންގެ ނަމުން ގޮވާ އަޚުލާޤީ ގޮތުން ދަށުދަރަޖައިގެ ބަސްތައް ބުނެފައި ވެއެވެ. އަދި މުޒާހަރާގެ ބައެއް އަންހެން ބައިވެރިންގެ ޢަމަލުތައް ވެސް އެފަދަ ގޮތަށް ހުރި ކަމަށް އެޗްއާރްސީއެމްގެ ރިޕޯޓްގައި ވަނީ ބުނެފައެވެ.
"މުޒާހަރާ ކޮންޓްރޯލް ކުރަން ތިބި ފިރިހެން ފުލުންހުންނަށް ފުރައްސާރަ ކުރުމުގެގޮތުން މުޒާހަރާގެ އަންހެން ބައިވެރިން ފުލުހުންގެ ގައިގައި ޖެހިގަނެ ވަކިވަކި ފުލުހުންގެ ނަމުން ގޮވާ، އަޚުލާޤީ ގޮތުން ދަށުދަރަޖައިގެ ބަސް ބުނަމުން ދިޔަކަމާއި ބައެއް އަންހެން ބައިވެރިންގެ ޢަމަލުތައްވެސް މިމޭރުމުން ހުރިކަން." އެޗްއާރްސީއެމްގެ ރިޕޯޓްގައި ބުނެފައިވެއެވެ.
މީގެ އިތުރުން އެޗްއާރްސީއެމްގެ ރިޕޯޓްގައި ބުނެފައިވާ ގޮތުގައި މުޒާހަރާގެ އަންހެން ބައިވެރިންގެ އަމަލުތައް ހުރިގޮތުން އައްޑޫ ސިޓީ ޕޮލިސް ކޮމާންޑަރު، ކޮމިޝަންގެ އޮފިސަރުން ކައިރިއަށް އައިސް، މުޒާހަރާގެ އަންހެން ބައިވެރިން އައިސް "މިކަންތައް މިގޮތަށް ހިންގަމުން ދާތީ ވަރަށް އުދަނގޫ" ވާ ކަމަށް ބުނެފައިވެއެވެ.