ފުލުހެއްގެ ކުރިމަތީ ފަރާތުގައި ފައިން ޖެހި ކަމަށް ސާބިތުވި ޏ.ފުވައްމުލަކު މީހަކު ތިން ހާސް ރުފިޔާ އިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފިއެވެ.
ފެބްރުއަރީ މަހުގެ 26 ވަނަ ދުވަހު ފުލުހަކަށް ހަމަލާ ދިނުމުގެ ކުށް ސާބިތުވެ ކްރިމިނަލް ކޯޓުން ޖޫރިމަނާކޮށްފައި ވަނީ ޏ.ފުވައްމުލައް/ރޯމާ، އިބްރާހިމް ޢާދިލެވެ.
"ޏ.ފުވައްމުލައް ކަސްޓޯޑިއަލްގައި އަޑުގަދަކޮށް ފުލުހުންގެ އަމުރަށް ނުކިޔަމަންތެރިވެ ޕޮލިސް ކޮންްސްޓަބަލް މުހައްމަދު އަފްރާހްގެ ކުރިމަތި ފަރާތުގައި މީނާގެ(އާދިލްގެ) ކަނާތުފައިން ޖަހާފައިވާކަމަށް(…..)" ކްރިމިނަލް ކޯޓުގެ ހުކުމްގައި ބުނެފައިވެއެވެ.
ޢާދިލްގެ މައްޗަށް ފުލުހުންގެ ދައުރު އަދާކުރަން ހުރި މީހަކަށް ހަމަލާ ދިނުމުގެ ކުށުގެ ދައުވާ އުފުލާފައި ވަނީ 2015 ވަނަ އަހަރުގެ ޖޫން މަހުގެ ތެރޭގައި ޏ.ފުވައްމަލަކު ޕޮލިސް ސްޓޭޝަންގައި ހުރި ފުލުހަކަށް ހަމަލާ ދީގެންނެވެ.
ޢާދިލްގެ މައްޗަށް ކުރި ދައުވާއަށް އޭނާ އިންކާރު ކުރި ނަމަވެސް އެ ދައުވާ ސާބިތުވާ ކަމަށްކްރިމިނަލް ކޯޓުން ކަނޑައަޅާފައި ވަނީ ދައުލަތުން ހުށަހެޅި ހެކިތަކުގެ މައްޗަށް ބިނާކޮށެވެ.